டிரம்ப் கையில் எடுக்கும் 'குண்டுகளின் தாய்'? அமெரிக்காவின் மெகா திட்டம்.. ஈரான் மீது அட்டாக்!

'குண்டுகளின் தாய்' (MOAB) என்றால் என்ன?

இந்த வெடிகுண்டின் அதிகாரப்பூர்வப் பெயர் GBU-43/B Massive Ordnance Air Blast (MOAB) ஆகும். அமெரிக்க ஆயுதக் கிடங்கில் இருக்கும் அணு ஆயுதம் அல்லாத குண்டுகளிலேயே இதுதான் மிக பிரம்மாண்டமானது.

இதன் மொத்த எடை சுமார் 9,800 கிலோ (கிட்டத்தட்ட 21,600 பவுண்டுகள்) ஆகும். இது ஜிபிஎஸ் (GPS) வழிகாட்டல் மூலம் மிகத் துல்லியமாக இலக்கைத் தாக்கும் வகையில் வடிவமைக்கப்பட்டுள்ளது. இதன் வெடிப்பு சக்தி கற்பனை செய்ய முடியாத அளவுக்குப் பெரியது. ஒரு நகரத்தின் 9 பெரிய தெருத் தொகுதிகள் கொண்ட பரப்பளவை இது நொடியில் தரைமட்டமாக்கும் திறன் கொண்டது.

இந்த குண்டு ஈராக் போரின் போது அமெரிக்காவால் உருவாக்கப்பட்டது. எதிரிகளின் மன உறுதியைச் சிதைக்கவும், அமெரிக்காவின் அதீத பலத்தைக் காட்டவும் இது வடிவமைக்கப்பட்டது. இதற்கு முன்பு, 2017-ஆம் ஆண்டு ஆப்கானிஸ்தானில் இருந்த ஐஎஸ்ஐஎஸ் பயங்கரவாதிகளின் குகை மற்றும் சுரங்கப் பாதைகளை அழிக்க டொனால்ட் டிரம்ப் முதல்முறையாக இந்த குண்டைப் பயன்படுத்த உத்தரவிட்டார்.

இந்த குண்டு எப்படி வேலை செய்கிறது?

பொதுவாக பதுங்கு குழிகளைத் தாக்கும் குண்டுகள் (Bunker Busters), பூமியை ஆழமாகத் தோண்டி உள்ளே சென்றுதான் வெடிக்கும். ஆனால் MOAB குண்டு அப்படிப்பட்டது அல்ல.

இது தரைக்கு மேல், காற்றில் இருக்கும்போதே வெடிக்கும் (Air-blast weapon). காற்றில் வெடிக்கும்போது உருவாகும் பயங்கரமான காற்று அழுத்தம் மற்றும் அதிர்வலைகள், தரைப்பரப்பில் உள்ள அனைத்துக் கட்டிடங்கள், தளங்கள் மற்றும் வாகனங்களை அடியோடு தகர்த்துவிடும். நிலப்பரப்பில் பெரும் பரப்பளவை அழிக்க இது மிகச் சிறந்தது.

புலியை துரத்தி துரத்தி சாய்த்த டிரம்ப்! 3 வீடியோக்களையும் பார்த்து கொதித்த மக்கள்.. என்ன நடந்தது

ஈரானின் அணுசக்தி தளங்களை இது அழிக்குமா?

இங்குதான் ஒரு பெரிய சிக்கல் உள்ளது. ஈரானின் மிக முக்கியமான அணுசக்தி திட்டம் அமைந்திருக்கும் இடமாக கருதப்படும் 'பிகாக்ஸ் மலை' (Pickaxe Mountain) போன்ற பகுதிகளை இந்த குண்டு அழிக்க வாய்ப்பு குறைவு என்று நிபுணர்கள் கூறுகிறார்கள்.

ஈரான் தனது அணுசக்தி சாதனங்களை வெறும் நிலத்தில் வைக்கவில்லை; கடினமான கிரானைட் பாறைகளுக்கு அடியில், பல நூறு அடிகள் ஆழத்தில் நிலத்தடி அரண்களாக அமைத்துப் பாதுகாத்து வருகிறது. MOAB தரைக்கு மேலே பெரும் சேதத்தை மட்டுமே ஏற்படுத்தும். பூமிக்கு அடியில் இருக்கும் பாறைகளைத் துளைத்துக்கொண்டு செல்லும் வலிமை இதற்கு கிடையாது.

ராணுவ திட்டமிடலில் தொடர்புடைய அதிகாரி ஒருவர் பேசுகையில், "MOAB என்பது எதிரிகளை மிரட்டுவதற்கும், தரைப்பரப்பைச் சுத்தப்படுத்துவதற்கும் ஏற்ற ஒரு குண்டு. ஆனால் பூமிக்குள் ஆழமாகச் சென்று தாக்கும் திறன் இதற்கு இல்லை" என்று தெளிவாகக் கூறியுள்ளார். எனவே, வாஷிங்டன் எதிர்பார்க்கும் முழு ராணுவ வெற்றியை இந்த குண்டால் தர முடியுமா என்பது கேள்விக்குறியாகவே உள்ளது.

வெனிசுலாவைத் தொடர்ந்து கிரீன்லாந்தில் எண்ணெய், கனிம வளங்களை அள்ளுவோம்.. டிரம்ப் அதிரடி அறிவிப்பு

அமெரிக்கா ஏன் இப்போது இதை யோசிக்கிறது?

அமெரிக்காவில் விரைவில் நாடாளுமன்ற இடைத்தேர்தல் வரவுள்ள நிலையில், உள்நாட்டு அரசியல் அழுத்தம் தீவிரமடைந்துள்ளது. அமெரிக்க அதிபர் டொனால்ட் டிரம்ப், ஈரானுடனான மோதலை முடிவுக்குக் கொண்டுவர விரும்பினாலும், ஒரு வலுவான வெற்றியை வெளிக்காட்ட வேண்டிய நிர்பந்தத்தில் உள்ளார்.

மத்திய கிழக்கு பிராந்தியத்தில் இருந்து அமெரிக்கப் படைகளைத் திரும்பப் பெறுவதற்கு முன்பாக, ஈரானின் எண்ணெய் மற்றும் எரிசக்தி நிலையங்கள் அல்லது அணு மையங்கள் மீது ஒரு கடுமையான தாக்குதலை நடத்திவிட்டு வெளியேறலாமா என்ற கோணத்தில் அமெரிக்க ராணுவம் இந்த திட்டத்தை வைத்துள்ளதாக தகவல்கள் தெரிவிக்கின்றன.

இருப்பினும், வெள்ளை மாளிகை இந்த ரகசிய ராணுவ திட்டங்கள் குறித்து நேரடியாகக் கருத்து தெரிவிக்க மறுத்துவிட்டது. ஈரான் அணு ஆயுதம் பெறுவதைத் தடுக்க அமெரிக்க அதிபர் அனைத்து வாய்ப்புகளையும் பரிசீலித்து வருவதாக மட்டுமே வெள்ளை மாளிகை தரப்பில் கூறப்பட்டுள்ளது.

ஒருவேளை அமெரிக்கா இந்த குண்டை வீசினால், ஈரானின் அணு ஆயுத முயற்சி முழுமையாக அழியாமல் போகலாம். ஆனால், இதன் பிரம்மாண்ட வெடிப்பு சக்தி காரணமாக அருகில் இருக்கும் பொதுமக்கள் அதிகம் பாதிக்கப்பட வாய்ப்புள்ளது. குறிப்பாக மக்கள் வாழும் பகுதிகளுக்கு அருகே இருக்கும் எரிசக்தி நிலையங்கள் மீது வீசப்பட்டால் பெரும் உயிர்ச்சேதம் ஏற்படும் என்ற அச்சமும் உலக நாடுகளுக்கு எழுந்துள்ளது. மேலும், இது மத்திய கிழக்கு பிராந்தியத்தில் முழு அளவிலான பெரும் போராக வெடிக்கவும் வழிவகுக்கும்.