ஒரு மேயர் பதவியையாவது ஜெயிச்சு பாருங்க..நான் என் ஒரு பக்க மீசையை எடுத்துக்குறேன்! ஆர்எஸ் பாரதி சவால்

அது ஒரு வகையான டைவர்ஸ்; ஆனால் காங்கிரஸ் உடன் செய்துள்ள டைவர்ஸ் வேறு வகையானது. இனிமேல் எந்த காலத்திலும் முதுகில் குத்துவிட்டு ஓடியவர்களை சேர்க்க மாட்டோம்; அவர்களோடு ஒட்டும் கிடையாது உறவும் கிடையாது;

ஆர்எஸ் பாரதி

இனி கட்சி தொண்டன் அவர்களை ஏற்றுக் கொள்ள மாட்டார்கள்; காங்கிரஸ் எங்கு உள்ளதோ அந்த கூட்டணியுடன் நாங்கள் இருக்க மாட்டோம். இனி எந்த காலத்திலும் காங்கிரசோடு கூட்டணி கிடையாது. பாஜக ஓடும் எந்த காலத்திலும் திமுக கூட்டணி சேராது. லாட்டரியில் ஜாக்பாட் அடித்தது போன்று இந்த தேர்தலில் தமிழக வெற்றி கழகத்திற்கு ஜாக்பாட் அடித்துள்ளது இந்த ஆட்சி எத்தனை மாத காலம் நீடிக்கும் என்பது சந்தேகம் தான். அண்ணாமலை கட்சி தொடங்கியுள்ளார் அவர் யாருக்கு பி டீமாக இருக்கப் போகிறார் என்பதை பொறுத்திருந்து பார்க்க வேண்டும்.

ஆதவ் அர்ஜுனா

பல்வேறு கட்சிகளுக்கு போய்ச் சென்ற ஆதவ் அர்ஜுனா திமுக குறித்து பேசுவதற்கு எந்த அருகதையும் கிடையாது. காங்கிரஸை கழற்றிவிட்டு புதிய இந்தியா கூட்டணி உருவாகுமா? என்ற கேள்விக்கு பதில் அளித்த ஆர் எஸ் பாரதி இன்னும் காலம் இருக்கிறது. ஒன்றைத் தெளிவாகப் புரிந்துகொள்ள வேண்டும். திமுக தலைவர் மு.க. ஸ்டாலின் அல்லது உதயநிதிக்கு சவால் விடும் அரசியல் தகுதி ஆதவ் அர்ஜுனுக்கு சிறிதளவும் இல்லை. அவர், "ஒரு தேர்தலில் ஒரு மேயரைக் கூட வெல்ல முடியாது" என்று கூறுகிறார்.

திமுக

ஆனால் அவர் வரலாற்றை அறியாமல் பேசுகிறார். எம்.ஜி.ஆரை விட பெரிய தலைவர் யாரும் இல்லை; விஜயும் இல்லை, வேறு யாரும் இல்லை. 1984 ஆம் ஆண்டு நடைபெற்ற தேர்தலில், நாங்கள் அங்கீகரிக்கப்பட்ட எதிர்க்கட்சியாகக் கூட வரவில்லை. அந்தத் தேர்தலில் எம்.ஜி.ஆர் அமெரிக்காவில் சிகிச்சை பெற்று கொண்டிருந்தபோதும், தேர்தலில் நேரடியாக பங்கேற்காமல் வெற்றி பெற்று மீண்டும் ஆட்சியில் அமர்ந்தார். அதன்பிறகு 1986ஆம் ஆண்டு நடைபெற்ற உள்ளாட்சித் தேர்தலில், 102 நகராட்சிகளில் சுமார் 90 நகராட்சிகளை எங்கள் கூட்டணி கைப்பற்றியது.

சட்டமன்றத் தேர்தல்

அந்தத் தேர்தலில் நாங்கள் மிகப்பெரிய வெற்றியைப் பெற்றோம். அந்தக் காலகட்டத்தில் தமிழ்நாடு முழுவதும் உள்ளாட்சித் தேர்தல்கள் நேரடித் தேர்தல் முறையில் நடைபெற்றன. நகராட்சி தலைவர்கள் நேரடியாகத் தேர்ந்தெடுக்கப்பட்டனர். ஒன்றியத் தலைவர்களும் நேரடி வாக்கெடுப்பின் மூலம் தேர்ந்தெடுக்கப்பட்டனர். அந்த அளவிற்கு முக்கியத்துவம் வாய்ந்த தேர்தலாக அது இருந்தது; ஒரு வகையில் அது சட்டமன்றத் தேர்தலுக்கு இணையானதாகக் கருதப்பட்டது.

மேயர் பதவி

எனவே, நான் அவரிடம் ஒரு கேள்வியை முன்வைக்கிறேன். ஆட்சிக்கு வந்து ஆறு மாதங்களுக்குப் பிறகு, ஜனவரி மாதத்தில் உள்ளாட்சித் தேர்தலை நடத்துங்கள். அதில் ஒரு மேயர் பதவியையாவது நீங்கள் வெல்ல முடிந்தால், நான் என் ஒரு பக்க மீசையை எடுத்துக் கொள்கிறேன். இந்தச் சவாலை ஏற்க அவர்கள் தயாரா? ஏனெனில், கடந்த ஒரு மாதமாக தமிழக மக்களிடம் பேசும்போது அவர்கள் கூறும் கருத்துகள் வேறுபட்டதாக உள்ளன. பலர், "எதிர்பாராத சூழ்நிலைகளாலும், குடும்பத்தினரின் வற்புறுத்தலாலும், பல்வேறு காரணங்களாலும் வாக்களித்தோம்" என்று தெரிவிக்கின்றனர்.

திமுக சவால்

மேலும், "அனைவரும் ஒரே திசையில் செல்லும்போது நாமும் அதே வழியில் சென்றோம்" என்ற மனநிலையும் பலரிடையே இருந்ததாகக் கூறுகின்றனர். அனைவரும் ஒரே முடிவை எடுப்பார்கள் என்று நினைத்து வாக்களித்தவர்களும் இருந்தனர். ஆனால் இறுதியில், அந்த மனநிலையே தேர்தல் முடிவுகளை நிர்ணயித்தது. அதன் விளைவாக, 107 பேர் வெற்றி பெற்றனர்" என கூறியுள்ளார்.