இராமநாதபுரம்: இராமநாதபுரம் மாவட்டம் பரமக்குடி அருகே உள்ள பாம்பூர் கவினா இன்டர்நேஷனல் சிபிஎஸ்இ பள்ளியில், "ஆறாவது விளையாட்டு தின விழா - 2026" மிகுந்த உற்சாகத்துடனும் மகிழ்ச்சியுடனும் நடைபெற்றது. பள்ளி வளாகமே விழாக்கோலம் பூண்டு, மாணவர்களின் ஆரவாரத்துடன் காட்சியளித்தது.
இந்தச் சிறப்பு விழாவிற்குப் பள்ளியின் தலைவர் கண்ணதாசன் பாண்டியன் மற்றும் தாளாளர் ஹேமலதா கண்ணதாசன் ஆகியோர் தலைமை வகித்தனர். பள்ளி முதல்வர் அனிதா, துணை முதல்வர்கள் ஜோய்ஸ் மற்றும் புவனேஸ்வரி ஆகியோர் முன்னிலை வகித்து நிகழ்வுகளை வழிநடத்தினர். விழாவில் துபாயைச் சேர்ந்த பிரபல பத்திரிகையாளர் முகம்மது ஹிதாயத்துல்லா சிறப்பு விருந்தினராகக் கலந்துகொண்டு விழாவைச் சிறப்பித்தார். விழாவின் தொடக்கமாக மாணவர்களின் கம்பீரமான அணிவகுப்பு நடைபெற்றது. சிறப்பு விருந்தினர் மாணவர்களின் அணிவகுப்பு மரியாதையை ஏற்றுக்கொண்டு, மாணவர்களை வாழ்த்திப் பேசினார். அதனைத் தொடர்ந்து தடகளப் போட்டிகள், உடற்பயிற்சி சாகசங்கள் மற்றும் வண்ணமயமான கலைநிகழ்ச்சிகள் அடுத்தடுத்து நடந்தன. மைதானத்தில் திரண்டிருந்த ஆசிரியர்களும் பெற்றோர்களும் மாணவர்களின் திறமையைப் பார்த்து கைதட்டி உற்சாகப்படுத்தினர். பல்வேறு போட்டிகளில் ஆர்வத்துடன் பங்கேற்று வெற்றி வாகை சூடிய மாணவ, மாணவிகளுக்குப் பள்ளித் தலைவர் கண்ணதாசன் பாண்டியன் மற்றும் தாளாளர் ஹேமலதா கண்ணதாசன் ஆகியோர் பதக்கங்கள், பரிசுகள் மற்றும் பாராட்டுச் சான்றிதழ்களை வழங்கி கௌரவித்தனர். "வெற்றி என்பது வெறும் பதக்கத்தில் மட்டும் அடங்கிவிடாது.. அதில் நாம் காட்டும் ஈடுபாடு, முயற்சி மற்றும் விடாமுயற்சியில்தான் உண்மையான வெற்றி இருக்கிறது" என்று பள்ளி நிர்வாகம் மாணவர்களுக்கு ஊக்கமளித்தது. மாணவர்களைச் சிறப்பாகத் தயார் செய்த உடற்கல்வி ஆசிரியர்கள், திறமைகளை வெளிக்கொணர உதவிய பிற ஆசிரியர்கள், உறுதுணையாக நின்ற பெற்றோர்கள் மற்றும் இந்த விழாவை ஒருங்கிணைத்த அனைவருக்கும் பள்ளி நிர்வாகத்தின் சார்பில் நெஞ்சார்ந்த நன்றி தெரிவிக்கப்பட்டது. மாணவர்களின் தனித்திறனையும் விளையாட்டு உணர்வையும் வெளிப்படுத்திய இந்த விழா, பெற்றோர்கள் மற்றும் பொதுமக்களின் பாராட்டுகளைப் பெற்று இனிதே நிறைவடைந்தது.முக்கியப் பிரமுகர்கள் பங்கேற்பு
மிடுக்கான அணிவகுப்பு மற்றும் போட்டிகள்
பரிசளிப்பும் பாராட்டும்