சென்னை: சிஎஸ்கே அணியின் பயிற்சியாளராக மோகித் சர்மா நியமனம் செய்யப்பட உள்ளதாக அந்த அணியின் சிஇஓ காசி விஸ்வநாதன் தெரிவித்துள்ளார். இதற்கான அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படும் சூழலில், மோகித் சர்மா நியமனத்தில் ஜாகீர் கானின் பங்கு அதிகம் இருப்பதாகவும் தெரிய வந்துள்ளது.
கடந்த வாரம் சிஎஸ்கே அணியின் புதிய பயிற்சியாளராக ஜாகீர் கான் நியமனம் செய்யப்பட்டார். 2 மாதங்களுக்கு பின் சிஎஸ்கே பயிற்சியாளர் பொறுப்பில் இருந்து ஸ்டீபன் ஃபிளமிங் விலகினார். 18 ஆண்டுகளுக்கு பின் இருவரும் சுமூகமாக பிரிந்தனர். இதன்பின் ஃபிளமிங் இங்கிலாந்து அணியின் டெஸ்ட் பயிற்சியாளர் பொறுப்பை ஏற்றுக்கொண்டார்.
சிஎஸ்கே அணிக்காக ஜாகீர் கான் நியமனம் செய்யப்பட்டது ரசிகர்களிடையே வரவேற்பை பெற்றது. தோனியுடன் மீண்டும் ஜாகீர் கான் இணைந்து பணியாற்றுவது நிச்சயமாக சுவாரஸ்யமான ஒன்றாக அமையும் என்று பார்க்கப்படுகிறது. இந்த நிலையில் சிஎஸ்கே அணியின் பவுலிங் பயிற்சியாளராக மோகித் சர்மா நியமனம் செய்யப்பட உள்ளதாக தெரிய வந்துள்ளது. இதுதொடர்பாக சிஎஸ்கே சிஇஓ காசி விஸ்வநாதன் பேசுகையில், ஜாகீர் கான் அடுத்ததாக துணைப் பயிற்சியாளர்கள் பட்டியலை தயார் செய்து வருகிறார். எனக்கு தெரிந்த வரை மோகித் சர்மாவை பவுலிங் பயிற்சியாளராக நியமிக்கும் முடிவை எடுத்துவிட்டார் என்றே நினைக்கிறேன் என்று கூறியுள்ளார். 38 வயதாகும் மோகித் சர்மா, ஏற்கனவே சிஎஸ்கே அணிக்காக விளையாடி இருக்கிறார். 2023 ஐபிஎல் சீசனில் கம்பேக் கொடுத்த மோகித் சர்மா, அதிக விக்கெட்டுகளை கைப்பற்றி பலருக்கும் ஆச்சரியம் கொடுத்தார். அதேபோல் இந்திய மைதானங்கள் குறித்து நல்ல புரிதலை கொண்டிருப்பவர். சிஎஸ்கே அணியின் கலாச்சாரத்தையும் உணர்ந்தவர். இதனால் மோகித் சர்மாவின் நியமனம் தொடர்பான அறிவிப்பு அடுத்த சில நாட்களில் வெளியாகும் என்று தெரிகிறது. அதேபோல் பேட்டிங் பயிற்சியாளராக மைக் ஹசி நியமனம் செய்யப்பட வாய்ப்புகள் குறைவு என்றே பார்க்கப்படுகிறது. ஜாகீர் கானின் மனதில் 3 முதல் 4 பெயர்கள் இருப்பதாகவும், அவர்களுடன் தொடர்பு கொண்டு பேசிய பின் இறுதி முடிவை ஜாகீர் கான் எடுப்பார் என்றும் தெரிகிறது. இதனால் ஜாகீன் கானின் முடிவுகள் மீதான எதிர்பார்ப்பு அதிகரித்துள்ளது.