மும்பை: இந்திய கிரிக்கெட் வரலாற்றில் இதுவரை இல்லாத அளவிற்கு மிகப்பெரிய வரலாற்றுச் சாதனை ஒன்று இன்று நிகழ்த்தப்பட்டுள்ளது. அயர்லாந்து மற்றும் இங்கிலாந்து அணிகளுக்கு எதிரான டி20 தொடருக்கான இந்திய கிரிக்கெட் அணி இன்று அதிகாரப்பூர்வமாக அறிவிக்கப்பட்டுள்ளது.
இந்த அணியில், வெறும் 15 வயதே ஆன இளம் இடதுகை பேட்டிங் சூறாவளி வைபவ் சூர்யவன்ஷி தேர்வு செய்யப்பட்டு ஒட்டுமொத்த கிரிக்கெட் உலகையும் ஆச்சரியத்தில் ஆழ்த்தியுள்ளார். இதன் மூலம், இந்திய அணியில் மிகக் குறைந்த வயதில் இடம்பிடித்த வீரர் என்ற பெருமையைப் பெற்று, 'கிரிக்கெட் கடவுள்' சச்சின் டெண்டுல்கரின் மாபெரும் சாதனையை அவர் தகர்த்துள்ளார்.
இந்திய ஆண்கள் கிரிக்கெட் அணியில் மிகக் குறைந்த வயதில் சர்வதேசப் போட்டிக்குத் தேர்வு செய்யப்பட்ட வீரர் என்ற அசைக்க முடியாத சாதனை கடந்த 36 ஆண்டுகளாக சச்சின் டெண்டுல்கர் வசம் இருந்தது. மாஸ்டர் பிளாஸ்டர் சச்சின் டெண்டுல்கர் கடந்த 1989ஆம் ஆண்டு பாகிஸ்தானுக்கு எதிராக தனது 16 வயது 205 நாட்களில் இந்திய அணியில் அறிமுகமாகி விளையாடினார். தற்போது வெறும் 15 வயதே ஆன வைபவ் சூர்யவன்ஷி, அஜித்பாபு அகர்கர் தலைமையிலான பிசிசிஐ தேர்வு குழுவால் இந்திய டி20 அணியில் சேர்க்கப்பட்டுள்ளார். இதன் மூலம் சச்சினின் சாதனையை முறியடித்து, இந்திய அணிக்குத் தேர்வான மிக இளம் வயது கிரிக்கெட் வீரர் என்ற உலக சாதனையை தன்வசப்படுத்தியுள்ளார். ஐபிஎல் தொடரில் ராஜஸ்தான் அணியின் தொடக்க ஆட்டக்காரரான வைபவ் சூர்யவன்ஷி, 16 போட்டிகளில் விளையாடி 776 ரன்கள் குவித்து 'ஆரஞ்சு தொப்பி' மற்றும் தொடரின் 'மிக மதிப்புமிக்க வீரர்' ஆகிய விருதுகளை அள்ளினார். பும்ரா, கம்மின்ஸ் போன்ற உலகத்தரம் வாய்ந்த பந்துவீச்சாளர்களை துவம்சம் செய்த அவருக்கு, தற்போது இந்திய அணியின் கதவுகள் திறக்கப்பட்டுள்ளன. பிசிசிஐ இன்று ஒரே நேரத்தில் அயர்லாந்து தொடர், இங்கிலாந்து தொடர் மற்றும் 2026 ஆசிய விளையாட்டுப் போட்டிகளுக்கான மூன்று டி20 அணிகளையும் அறிவித்துள்ளது. இந்த மூன்றிலுமே வைபவ் சூர்யவன்ஷி சேர்க்கப்பட்டுள்ளார். ஹர்திக் பாண்டியா, ரிங்கு சிங் போன்ற முன்னணி வீரர்கள் அணியில் இருந்து நீக்கப்பட்டுப் பல அதிரடி மாற்றங்கள் செய்யப்பட்டுள்ளன. இருப்பினும் 15 வயது சிறுவன் வைபவ் சூர்யவன்ஷியின் தேர்வுதான் தற்போது உலக கிரிக்கெட் ரசிகர்களின் ஹாட் டாபிக்காக மாறியுள்ளது. அயர்லாந்து மண்ணில் அவர் காலடி எடுத்து வைக்கும் போது, சர்வதேச கிரிக்கெட்டில் விளையாடும் மிக இளவயது இந்திய வீரர் என்ற வரலாற்றுப் பதிவை அதிகாரப்பூர்வமாகப் படைப்பார்.