எதிரே அமர்ந்திருந்தும் உதயநிதியை பார்க்காத விஜய்! பட்ஜெட் கூட்டத்தொடரில் அரங்கேறிய அக்னி பரீட்சை

நேருக்கு நேர் அமர்ந்த எதிரிகள்

சட்டமன்ற மரபுப்படி, அவையின் முன்னணியில் ஆளுங்கட்சியின் தலைவரான முதலமைச்சர் விஜய்யும், அவருக்கு நேர் எதிரே எதிர்க்கட்சித் தலைவரான உதயநிதி ஸ்டாலினும் அமர்ந்திருந்தனர். இருவருக்கும் இடையே சில அடிகள் இடைவெளி மட்டுமே இருந்தபோதிலும், அவைக்குள் நிலவிய மனரீதியான இடைவெளி பல மைல் தூரத்திற்கு நீடித்தது.

நேற்றைய கைது படலத்திற்குப் பிறகு, இரு தலைவர்களும் அவையில் சந்திக்கும் போது என்ன நடக்கும், வார்த்தைப் போர்கள் வெடிக்குமா அல்லது பார்வைகளிலேயே சலசலப்பு ஏற்படுமா என அரசியல் பார்வையாளர்கள் மற்றும் ஊடகவியலாளர்கள் தங்களது கழுகுக் கண்களை இருவர் மீதும் பதித்திருந்தனர்.

கண் பார்வையைத் தவிர்த்த விஜய்

நிதி அமைச்சர் மரிய வில்சன் தவெக அரசின் முதல் பட்ஜெட்டைத் தாக்கல் செய்து உரையாற்றத் தொடங்கியதில் இருந்து, உரை நிறைவடையும் வரை சுமார் 2 மணி நேரத்திற்கும் மேலாக முதல்வர் விஜய் தனது பார்வையை முழுக்க முழுக்க நிதி அமைச்சரின் பக்கமும், அவையின் சபாநாயகர் பக்கமுமே வைத்திருந்தார்.

தனக்கு நேர் எதிரே கம்பீரமாகச் சிரித்த முகத்துடன் அமர்ந்திருந்த உதயநிதி ஸ்டாலினை நோக்கி ஒருமுறை கூட விஜய் தனது பார்வையைத் திருப்பவில்லை. தற்செயலாகக் கூட இருவரின் பார்வைகளும் சந்தித்துக் கொள்ளக் கூடாது என்பதில் விஜய் மிகவும் கவனமாக இருந்ததாக அவை வட்டாரங்கள் தெரிவிக்கின்றன.

உதயநிதி

அதே வேளையில், எதிர்க்கட்சித் தலைவர் வரிசையில் அமர்ந்திருந்த உதயநிதி ஸ்டாலின், நிதி அமைச்சரின் பட்ஜெட் அறிவிப்புகளைக் கவனித்தபடியே, இடையே பலமுறை முதல்வர் விஜய்யை உற்று நோக்கினார். திமுகவின் மூத்த தலைவர்களுடன் இடையே பேசியபடியே அமர்ந்திருந்த உதயநிதி, தவெக அரசின் பட்ஜெட் அறிவிப்புகளின் போது சில இடங்களில் தனது புன்னகையையும், சில இடங்களில் முகம் சுளிப்பையும் வெளிப்படுத்தினார்.

ஆனால், எவ்வளவு முயற்சித்தபோதிலும், விஜய்யின் பார்வை உதயநிதி பக்கம் திரும்பவே இல்லை. பட்ஜெட் உரை முழுவதும் இரு தலைவர்களுக்கும் இடையே எவ்விதக் கண் தொடர்பும் ஏற்படவே இல்லை.

அமைதிக்கு பின்னே புயல்?

பட்ஜெட் தாக்கல் செய்யப்பட்ட இன்றைய நாளில் பெரிய அளவிலான அமளிகள் ஏதும் அவைக்குள் நிகழவில்லை என்றாலும், முதலமைச்சர் விஜய்யின் இந்த செயல் மற்றும் உதயநிதியின் அமைதியான அணுகுமுறை ஆகியவை வரவிருக்கும் நாட்களுக்கான புயலின் முன் அறிவிப்பாகவே பார்க்கப்படுகிறது.

நாளை வேளாண் பட்ஜெட் தாக்கல் செய்யப்பட்டு, அதன் பிறகு பட்ஜெட் மீதான விவாதம் தொடங்கும் போது, நேற்றைய கைது விவகாரம் மற்றும் காவிரிப் பிரச்சினை குறித்து திமுக தவெகவை கடுமையாகச் சூழும் என்றும், அப்போது இரு தலைவர்களுக்கும் இடையிலான நேரடி மோதல் அவைக்குள் வெடிக்கும் என்றும் எதிர்பார்க்கப்படுகிறது.