மாப்ள சீமான்! ஒரு 2 மாசத்துக்கு முன்னாடி வந்திருந்தீங்கன்னா.. நயினார் பேச பேச சிரித்த அரங்கம்

நடிகர் சரத்குமாருக்கு ரூபாய் நோட்டுகளால் ஆன பிரம்மாண்ட மாலை அணிவிக்கப்பட்டது. இந்த விழாவில் பேசிய தனியரசு, சரத்குமாரை மத்திய அமைச்சராக்க வேண்டும். சீமானை முதல்வராக்க வேண்டும் என பேசினார்.

இதைத் தொடர்ந்து தமிழக பாஜக தலைவர் நயினார் நாகேந்திரன் பேசுகையில், இந்த மேடை எவ்வளவு அழகாக இருக்கிறது பார்த்தீர்களா? மாப்ள சீமான் உள்பட எல்லாரும் இங்கே இருக்கிறார்கள். ஒரு 2 மாசத்திற்கு முன்னாடி இந்த மேடை இதே போல் இருந்திருந்தால் நிலைமை என்ன ஆகியிருக்கும் தமிழ்நாட்டில்? பார்ப்போம், இனிமேல் எப்படி நடக்கிறது என பார்க்கலாம்!

ஆனால் சில பேர் எடுத்த எடுப்பிலேயே முதல்வராக வந்துவிடுகிறார்கள்! இறைவன் சில நேரங்களில் யாரை எந்த இடத்தில் வைக்கக் கூடாதோ அந்த இடத்தில் வைத்து விடுகிறார். அதற்காக காலகட்டம் , இப்போது கலிகாலம் நடைபெற்றுக் கொண்டிருக்கிறது. இவ்வாறு நயினார் நாகேந்திரன் பேசினார்.

அவர் மேலும் பேசுகையில் எதிர்பார்ப்புடன் ஒரு கூட்டம் இருக்கும் போது 40 ஆண்டுகலுக்கு முன்பு எந்த எதிர்பார்ப்பும் இல்லாத இந்த கூட்டத்திற்கு எனது வணக்கத்தை தெரிவித்துக் கொள்கிறேன். ரசிகர் கேட்ட உடன் கையில் இருக்கும் ரூ 7 லட்சம் வாட்சை கழட்டி கொடுக்கிறார் சரத்குமார். இவருக்கு முதல்வராகும் அனைத்து தகுதிகளும் உள்ளது.

ஒரு நயா பைசா இல்லாமல் தேசிய கட்சியில் சரத்குமார் தன்னை இணைத்துக் கொண்டுள்ளார். நிச்சயம் தேசிய அளவிலான பதவிகள் அவரை தேடி வரும். லட்சக்கணக்கான மக்களின் மனதை கொள்ளை கொண்டவர். அவர் ஒரு சமுதாயத்தில் இருப்பவர்களுக்கு மட்டும் ரசிகர் என்றால் நான் ஏற்க மாட்டேன் என பேசினார்.

இந்த கூட்டத்தில் சீமான் பேசுகையில், ஒரு கட்சியை சார்ந்து ஒருவர் இருந்தால் அவர் உறவினராக இருந்தாலும் பேசக் கூடாது. இப்படிப்பட்ட ஒரு மனப்போக்கு இருக்கிறது. எங்களுடைய அரசியல் நிலைப்பாடு கொள்கை கோட்பாடு வேறாக இருக்கலாம். நாங்கள் ஒரு தாய் பிள்ளை என்பதில் யாருக்கும் மாற்றுக் கருத்து இல்லை.

சரத்குமாரை ரோல் மாடலாக எடுத்துக் கொள்ள வேண்டும். தனது உடலை பேணி பாதுகாத்து வருகிறார். இந்தியாவிலேயே பிஸியான மனிதர் 42 படங்கள் நடிக்கும் ஒரே நபர் இவர்தான். எல்லா மொழிகளிலும் நடித்துக் கொண்டிருக்கிறார். இவ்வாறு சீமான் பேசினார்.