திருச்சி: தனது திருச்சி கிழக்கு தொகுதி எம்.எல்.ஏ. பதவியை ராஜினாமா செய்த பிறகு, தமிழக முதலமைச்சரும் தவெக தலைவருமான சி. ஜோசப் விஜய் இன்று திருச்சிக்கு முதல் முறையாக அரசுமுறைப் பயணமாக வந்தார். நன்றி அறிவிப்புக் கூட்டத்தில் பங்கேற்ற அவர், அரசியல் அரங்கில் புதிய விவாதத்தை கிளப்பும் விதத்தில் ஒரு முக்கிய நபரை மேடையேற்றினார்.
முன்னாள் அமைச்சரும், திருச்சி அரசியலின் மூத்த தலைவருமான கு. பா. கிருஷ்ணனின் மகன் க. சிரஞ்சீவி இன்று முதல்வர் விஜய்யின் மேடையில் திடீர் அறிமுகம் செய்யப்பட்டார். மேடைக்கு வந்த சிரஞ்சீவி, முதல்வர் விஜய்க்கு பிரம்மாண்டமான வெள்ளிக் கோல் ஒன்றை கௌரவமாக வழங்கினார். இந்த நிகழ்வு திருச்சி அரசியல் வட்டாரத்தில் பெரும் பரபரப்பை ஏற்படுத்தியுள்ளது.
பொதுக்கூட்டத்தில் உரையாற்றிய முதல்வர் விஜய், திருச்சி கிழக்கு இடைத்தேர்தல் குறித்து மிக முக்கிய அறிவிப்பை வெளியிட்டார். "திருச்சி கிழக்கு தொகுதி மக்களின் அன்பை நான் ஒருபோதும் மறக்க மாட்டேன். ராஜினாமா செய்தாலும் இந்தத் தொகுதியை நான் கைவிடப் போவதில்லை. உங்களுக்குச் சேவை செய்ய, உங்கள் மண்ணின் மைந்தன் ஒருவரே தவெக சார்பில் வேட்பாளராகக் களமிறங்குவார்" என்று அதிரடியாக அறிவித்தார்.
விஜய்யின் இந்த 'மண்ணின் மைந்தன்' குறிப்பும், அதற்கு சில நிமிடங்களுக்கு முன்பு கு.பா. கிருஷ்ணனின் மகன் சிரஞ்சீவிக்கு அளிக்கப்பட்ட முக்கியத்துவமும் தற்செயலானவை அல்ல என அரசியல் பார்வையாளர்கள் கருதுகின்றனர். இது திருச்சி கிழக்கு இடைத்தேர்தலில் தவெக வேட்பாளராக க. சிரஞ்சீவியை அறிவிப்பதற்கான முன்னோட்டம் என்கின்றனர். யார் இந்த க. சிரஞ்சீவி? திருச்சி மாவட்ட அரசியலில் கு. பா. கிருஷ்ணன் குடும்பத்திற்கு பாரம்பரிய செல்வாக்கு உண்டு. அதிமுக ஆட்சியில் விவசாயத் துறை அமைச்சராகப் பணியாற்றிய கு. பா. கிருஷ்ணன், திருச்சி மற்றும் சுற்றுவட்டாரப் பகுதிகளில் வலுவான வாக்கு வங்கியை கொண்டிருந்தார். அவரது மகன் க. சிரஞ்சீவி, கல்வியறிவு மிக்க, இளைஞர்களை ஈர்க்கும் புதிய முகமாக அறியப்படுகிறார். தவெக தலைமை ஏற்கனவே "உள்ளூர் செல்வாக்கு + தூய்மையான பின்னணி" கொண்ட வேட்பாளர்களை இடைத்தேர்தல்களில் நிறுத்தும் திட்டத்தை வகுத்துள்ளது. அந்த வகையில், திருச்சி கிழக்கு தொகுதியில் க. சிரஞ்சீவி தவெக வேட்பாளராக இருக்கலாம் என்கிற ஊகங்கள் தீயாகப் பரவி வருகின்றன. முதலமைச்சர் விஜய்யின் கையில் சிரஞ்சீவி வழங்கிய வெள்ளிக் கோல், வெறும் மரியாதை பரிசு மட்டுமல்ல; திருச்சி கிழக்கு இடைத்தேர்தல் களம் தவெக வசமே இருக்கும் என்பதற்கான அரசியல் சமிக்ஞை என்கின்றனர் அரசியல் வட்டாரங்கள். இந்த நிகழ்வு அதிமுக, திமுக உள்ளிட்ட கட்சிகளிடையேயும் பரபரப்பை ஏற்படுத்தியுள்ளது. திருச்சி கிழக்கு தொகுதி மக்கள் மத்தியில் விஜய்க்கு நல்ல வரவேற்பு இருப்பதால், உள்ளூர் செல்வாக்கு மிக்க சிரஞ்சீவி போட்டியிட்டால் வெற்றி வாய்ப்பு அதிகம் என தவெக தரப்பு நம்பிக்கை தெரிவிக்கிறது. மறுபுறம், எதிர்க்கட்சிகள் இந்தக் கூட்டணி முயற்சியை உன்னிப்பாக கவனித்து வருகின்றன. இந்த அறிவிப்பு தமிழக அரசியலில் புதிய சமன்பாடுகளை உருவாக்கும் என எதிர்பார்க்கப்படுகிறது. திருச்சி மண்ணின் மைந்தனுக்கு மக்கள் ஆதரவு கிடைக்குமா என்பது வரும் நாட்களில் தெரியவரும்.