நடுரோட்டில் திறந்த ஆம்னி பஸ் கதவு.. நூலிழையில் தப்பிய வாகன ஓட்டிகள்.. திருச்செந்தூரில் அதிர்ச்சி

திடீரென திறந்த கதவு

இந்த நிலையில், சென்னையில் இருந்து திருச்செந்தூர் நோக்கி வந்த தனியார் ஆம்னி பேருந்து ஒன்று சென்று கொண்டிருந்தபோது, அதன் இடதுபுறத்தில் இருந்த லக்கேஜ் கதவு திடீரென திறந்தது. இதனால், பேருந்தின் அருகே சென்ற இருசக்கர மற்றும் நான்கு சக்கர வாகன ஓட்டிகள் அதிர்ச்சியடைந்து பதற்றமடைந்தனர்.

இதனைத் தொடர்ந்து, பேருந்தை முந்திச் சென்ற சில இருசக்கர வாகன ஓட்டிகள், ஆம்னி பேருந்தை நிறுத்துமாறு கூறி ஓட்டுநர் மற்றும் உதவியாளரிடம் கடும் வாக்குவாதத்தில் ஈடுபட்டனர். இதையடுத்து பேருந்தை நிறுத்திய ஓட்டுநர், திறந்திருந்த லக்கேஜ் கதவுகளை உடனடியாகப் பூட்டினார்.

அசம்பாவிதம் தவிர்ப்பு

இருப்பினும், வாகன ஓட்டிகள் தொடர்ந்து வாக்குவாதத்தில் ஈடுபட்டனர். இன்னும் சிறிது தூரம் சென்றிருந்தால் திருச்செந்தூர் பிரதான பஜார் பகுதிக்கு பேருந்து சென்றிருக்கும். அங்கு மக்கள் மற்றும் வாகனப் போக்குவரத்து அதிகமாக இருக்கும் நிலையில், இதுபோன்று லக்கேஜ் கதவு திடீரென திறந்திருந்தால் பல வாகனங்கள் விபத்தில் சிக்கி உயிரிழப்புகள் ஏற்படும் அபாயம் இருந்திருக்கும் என வாகன ஓட்டிகள் ஆவேசமாகத் தெரிவித்தனர்.

இதற்கிடையில், தகவலறிந்து சம்பவ இடத்திற்கு விரைந்து வந்த போலீசார், வாகன ஓட்டிகள் மற்றும் ஆம்னி பேருந்து ஓட்டுநர் தரப்பினரிடம் பேச்சுவார்த்தை நடத்தி சமாதானப்படுத்தி அனுப்பி வைத்தனர். ஓடிக்கொண்டிருக்கும் ஆம்னி பேருந்துகளில் லக்கேஜ் கதவுகள் உள்ளிட்ட பாதுகாப்பு அம்சங்களை முறையாகச் சரிபார்த்த பின்னரே இயக்க வேண்டும் என வாகன ஓட்டிகள் வலியுறுத்தினர். இச்சம்பவத்தால் அப்பகுதியில் சிறிது நேரம் பரபரப்பு நிலவியது.