காயத்தால் காணாமல் போனாலும், காமன்வெல்த்தில் சாதித்த தமிழன்.. யார் இந்த கோவில்பட்டி ராஜா?

காமன்வெல்த் போட்டியில் வெள்ளி பதக்கம் வென்றுள் ராஜா, அவருடைய சகோதரர் சுரேஷ்குமார் இருவரும் தொடக்கத்தில் கபடி விளையாட்டில் ஆர்வம் செலுத்திய நிலையில், உடலை பராமரிக்க வேண்டும், உடல் வலிமை பெற வேண்டும் என்பதற்காக சங்கரலிங்கபுரத்தில் உள்ள ஜிம்மில் பயிற்சி பெற சென்றுள்ளனர். இவர்கள் ஜிம்மில் காட்டும் ஆர்வத்தை பார்த்து அங்குள்ள பயிற்சியாளர்கள் இருவரையும் பளுதூக்கும் விளையாட்டிற்கு தயார் செய்துள்ளனர்.

வெள்ளிப் பதக்கம் அமைந்துள்ள ராஜா தனது பள்ளி காலத்தில் இருந்தே பளுதூக்கும்போட்டியில் வெற்றி பெற்று சாதனை படைக்க அவருக்கு மயிலாடுதுறையில் உள்ள சாய் விளையாட்டு விடுதியில் இடம் கிடைத்து, அங்கு பயிற்சி பெற்று மாநிலம் மற்றும் தேசிய அளவிலான போட்டிகளில் வெற்றி பெற்ற சாதனை படைக்க, அதன்பிறகு பெரம்பூர் ரயில்வேயில் அவருக்கு பணி கிடைத்தது.

2018ல் முதல் முறையாக ராஜா காமன்வெல்த் போட்டியில் பங்கேற்று ஆறாவது இடம் பிடித்தார். 2022ல் நடைபெற்ற காமன்வெல்த் போட்டியில் உடல்நிலை பாதிப்பு காரணமாக பங்கேற்க முடியாத சூழ்நிலை இருந்தது. இந்த நிலையில் தான் தற்போது ஸ்காட்லாந்தின் கிளாஸ்கோ நகரில் நடைபெற்று வரும் காமன்வெல்த் போட்டியில் 65கிலோ எடை பிரிவு பளுதூக்கும் போட்டியில் ராஜா வெள்ளி பதக்கம் வென்று சாதனை படைத்துள்ளார்.

ராஜாவின் பெற்றோர் கூறுகையில், "நாங்கள் பட்ட கஷ்டங்களுக்கு வெற்றி கிடைத்துள்ளது, எங்களுக்கு மகிழ்ச்சியாத இருக்கிறது, கபடி விளையாடிக் கொண்டிருந்த நிலையில் உடலை வலிமையாக வைத்திருக்க வேண்டும் என்பதற்காக எங்கள் மகன் ஜிம்மிற்கு சென்றார்.. அங்குள்ள பயிற்சியாளர்கள் பளுதூக்கும் பயிற்சி செய்தால் நிச்சயமாக ஒரு நல்ல இடத்திற்கு வர முடியும் என்று கூறியதால், எனது மகனுக்கும் அதில் ஆர்வம் ஏற்பட்டது. அவனின் ஆர்வத்தைக் கண்டு நாங்களும் கஷ்டத்தை பார்க்காமல் கூலிவேலை செய்து அந்தப் பயிற்சிக்கு தேவையான அனைத்தையும் ஏற்பாடு செய்து கொடுத்தோம். 2018, 2022ல் காமன்வெல்த் போட்டியில் முயற்சி செய்து வெற்றி பெற முடியவில்லை தற்போது வெற்றி பெற்று வெள்ளி வென்றுள்ளார். மகிழ்ச்சி அளிக்கிறது என அவரது பெற்றோர் தெரிவித்துள்ளனர்.

அவருடைய சகோதரர் சுரேஷ்குமார் கூறுகையில், "சிறுவயதில் இருந்து நானும் தம்பியும் முதலில் கபடி விளையாடினோம் அதன் பின்னர் தான் பளுதூக்குதல் பயிற்சி பெற்றோம். தன்னுடைய தம்பி ராஜா தேசிய மற்றும் உலக அளவிலான போட்டிகளில் பங்கேற்று பல்வேறு பதங்களை பெற்றுள்ளார். தன்னுடைய தம்பியின் தொடர் முயற்சி காரணமாக வெள்ளி பதக்கம் வென்று உள்ளார். ஒலிம்பிக்கில் தங்கப்பதக்கம் வென்று இந்திய நாட்டிற்கும் தமிழ்நாட்டிற்கும் பெருமை சேர்க்க வேண்டும் என்பது அவருடைய லட்சியம் என்றார்.

வெள்ளி பதக்கம் வென்ற ராஜாவிற்கு முதன் முதலில் பயிற்சியாளராக இருந்த சொர்ணமுத்து கூறுகையில், "நானும் ஒரு பளுதூக்கும் வீரர் தான், 1999ல் நடைபெற்ற காமன்வெல்த் போட்டியில் பதக்கம் வென்று உள்ளேன். சங்கிலிங்கபுரம் பகுதியைச் சேர்ந்த பல வீரர்கள் பளுதூக்கும் போட்டியில் ஒலிம்பிக், காமன்வெல்த், ஆசிய விளையாட்டுப் போட்டிகளில் பதக்கம் வென்று சாதனை படைத்துள்ளனர். அந்த வகையில் எனது மாணவர் ராஜா முத்துப்பாண்டியும் காமன்வெல்த் போட்டியில் வெள்ளி வென்று சாதனை படைத்துள்ளது. எனக்கு மகிழ்ச்சி அளிக்கிறது. மேலும் மேலும் அவர் வெற்றி பெற வேண்டும்.

கோவில்பட்டி பகுதியில் ஏராளமான பளுதூக்கும் வீரர்கள் உள்ளனர். எனவே தமிழ்நாடு விளையாட்டு மேம்பாட்டு ஆணையம் சார்பில் ஜிம் அமைக்க வேண்டும் என்று பலமுறை நாங்கள் தொடர்ந்து கோரிக்கை வைத்து வருகிறோம். அவ்வாறு அமைக்கப்பட்டால் ஏராளமான வீரர்கள் பயன்பெறுவார்கள். பதக்கங்களை வெல்வார்கள்" இவ்வாறு பயிற்சியாளர் சொர்ணமுத்து கூறினார்.