ஈரானிடம் அணு ஆயுதத்தை விட மோசமான புதிய ஆயுதம்.. அமெரிக்க உளவுத்துறை வார்னிங்!

அணு ஆயுதத்தை விட மிகவும் சக்திவாய்ந்தது

ஹார்முஸ் ஜலசந்தியையும் மூடுவதாக அறிவித்தது. ஈரானின் இந்த நடவடிக்கையில் சர்வதேச அளவில் எண்ணெய் சந்தைகள் ஆட்டம் கண்டன. போரை முடிக்க பாகிஸ்தான் மத்தியஸ்தத்தில் தீவிர பேச்சுவார்த்தை நடைபெற்றது. இதன் பலனாக போர் நிறுத்தம் ஏற்பட்டுள்ளது. இதற்கான ஒப்பந்தம் வரும் வெள்ளிக்கிழமை சுவிட்சர்லாந்தில் கையெழுத்தாக உள்ளது. ஒட்டுமொத்த உலகமும் இதனை உன்னிப்பாக கவனித்து வருகிறது.

மேற்கு ஆசியாவில் நடந்த மோதல்கள் மற்றும் அமெரிக்காவுடன் போர் நிறுத்தம் செய்த பிறகு, "அணு ஆயுதத்தை விட மிகவும் சக்திவாய்ந்த" ஒரு புதிய ஆயுதத்தை ஈரான் பெற இருப்பதாக அமெரிக்க உளவுத்துறை மதிப்பீடு செய்து எச்சரித்து இருப்பதாக தகவல்கள் வெளியாகியுள்ளன. உலகின் மிக முக்கியமான கடல் பாதையான ஹார்முஸ் ஜலசந்தியை (Strait of Hormuz) ஈரான் எப்போது வேண்டுமானாலும் மூடிவிட முடியும் என்று அமெரிக்க உளவு அமைப்புகள் தெரிவித்துள்ளன. அமெரிக்காவுடன் அமைதி ஒப்பந்தம் ஏற்பட்டாலும், உலகப் பொருளாதாரத்தை பாதிக்கும் ஈரானின் இந்த திறன் இன்னும் அச்சுறுத்தலாகவே உள்ளது என உளவுத்துறை மதிப்பிட்டுள்ளதாக சிஎன்என் செய்தி வெளியிட்டுள்ளது.

சக்தி வாய்ந்த ஆயுதம்

இது குறித்து கூறப்பட்டு இருப்பதாவது:- வளைகுடா நாடுகளின் எரிசக்தி மையங்கள் மீது எப்படித் தாக்குதல் நடத்தலாம் என்பதை ஈரான் நன்கு கற்றுக் கொண்டுள்ளது. இது அமெரிக்காவின் பலவீனமான பகுதியாக மாறியுள்ளது என்று இந்த விவகாரத்தை நன்கு அறிந்த வட்டாரங்கள் தெரிவித்துள்ளன. "ஹார்முஸ் ஜலசந்தியின் முழுக் கட்டுப்பாட்டையும் நாம் ஈரானிடம் கொடுத்துவிட்டோம். இது எந்த அணு ஆயுதத்தை விடவும் சக்தி வாய்ந்த ஆயுதம்" என்றும் கூறப்பட்டுள்ளதாக தெரிவிக்கப்பட்டுள்ளது.

அமெரிக்கா- ஈரான் இடையே எட்டப்பட்ட 14 அம்சங்களைக் கொண்ட ஒப்பந்தத்தின் ஆவணங்களில் சில தகவல்கள் கசிந்துள்ளதாக கூறப்படுகிறது. இந்த ஒப்பந்தத்தின் படி, முடக்கி வைக்கப்பட்டுள்ள ஈரானின் சொத்துகளை விடுவிக்கவும், 300 பில்லியன் டாலர் முதலீட்டை உள்ளடக்கிய ஈரானின் பொருளாதார மேம்பாட்டுத் திட்டத்தை உருவாக்கவும் அமெரிக்கா ஒப்புக்கொண்டுள்ளதாக தெரிவிக்கப்பட்டுள்ளது. இந்த வரைவு ஒப்பந்தம் குறித்த தகவலை ராய்ட்டர்ஸ் மற்றும் அல் அரேபியா வெளியிட்டுள்ளன. அதில், ஈரான் ஒருபோதும் அணு ஆயுதங்களை தயாரிக்காது என்று உறுதியளித்துள்ளதாகவும், அதற்கு பதிலாக பேச்சுவார்த்தைக் காலத்தில் ஈரானின் கச்சா எண்ணெய், பெட்ரோ கெமிக்கல் பொருட்கள் மற்றும் வங்கி சேவைகள் உள்ளிட்ட துறைகளின் மீதான தடைகளை அமெரிக்கா தளர்த்தும் என்றும் குறிப்பிடப்பட்டுள்ளது.

நிரந்தரமாக முடிவுக்கு கொண்டு வர

மேலும், இறுதி ஒப்பந்தம் எட்டப்பட்டதும் அனைத்து பொருளாதாரத் தடைகளையும் நீக்க அமெரிக்கா உறுதியளித்துள்ளதாக கூறப்படுகிறது. இந்த புரிந்துணர்வு ஒப்பந்தம் வருகிற ஜூன் 19 ஆம் தேதி Geneva நகரில் அமெரிக்கா மற்றும் ஈரானின் உயர்மட்ட அதிகாரிகள் முன்னிலையில் கையெழுத்தாகும் என எதிர்பார்க்கப்படுகிறது. ஒப்பந்த வரைவில் "லெபனான் உள்ளிட்ட அனைத்து முனைகளிலும் நடைபெற்று வரும் போரை உடனடியாகவும் நிரந்தரமாகவும் முடிவுக்குக் கொண்டு வர வேண்டும். இனி ஒருவருக்கு எதிராக ஒருவர் எந்தவித விரோத நடவடிக்கைகளையும் மேற்கொள்ள மாட்டோம்" என்ற உறுதிமொழியும் இடம்பெற்றுள்ளதாக கூறப்படுகிறது.