சென்னை: நடிகர், இயக்குநர் என திரை உலகில் தனக்கென ஒரு இடத்தை பிடித்திருக்கும் போஸ் வெங்கட், கடந்த சில ஆண்டுகளாக விஜயின் அரசியல் குறித்து தொடர்ந்து விமர்சனமாக கருத்து தெரிவித்து வந்தவர். விஜய் அரசியலுக்கு வந்தபோதும், தேர்தல் களத்தில் இறங்கியபோதும், பின்னர் முதலமைச்சராக உயர்ந்த பிறகும் கூட தனது அரசியல் நிலைப்பாட்டை மாற்றாமல் பேசியவர்களில் போஸ் வெங்கட்டும் ஒருவர். ஆனால் இப்போது அந்த விமர்சனங்களுக்கு அவர் கொடுத்து வரும் விலை வேற லெவலுக்கு போய்விட்டதாகவே அவரது சமீபத்திய பேட்டி காட்டுகிறது.
விஜய் ரசிகர்களின் கடும் எதிர்ப்பால் தனக்கு சமூக வலைதளத்திலும், சினிமா வாய்ப்புகளிலும் சிக்கல் உருவாகி வருவதாக போஸ் வெங்கட் வெளிப்படையாக கூறியிருப்பது தற்போது பரபரப்பை ஏற்படுத்தியுள்ளது. "நான் விஜயை தனிப்பட்ட முறையில் தாக்கியதே கிடையாது; அவருடைய அரசியல், கொள்கை, செயல் முறை பற்றி தான் பேசியிருக்கிறேன். ஆனால் அதற்குப் பதிலாக என்னுடைய குடும்பம், தொழில், சினிமா வாய்ப்பு எல்லாம் டார்கெட் ஆகிறது" என்று அவர் கூறியிருப்பது சமூக வலைதளத்தில் வேகமாக வைரலாகி வருகிறது.
போஸ் வெங்கட் பேட்டியில், "நான் நடித்த படங்கள் பற்றி சமூக வலைதளத்தில் கமெண்ட் போடும்போது, 'இவரை எதுக்கு நடிக்க வச்சீங்க? இவர் நடித்த படத்தை நாங்கள் பார்க்க மாட்டோம்' என்று எழுதுகிறார்கள். அது என்னை விமர்சிப்பது அல்ல; நான் செய்யும் தொழிலையே அவமானப்படுத்துவது" என்று அவர் தெரிவித்திருக்கிறார். ஒரு நடிகருக்கு அவரது படத்தைப் பார்த்து விமர்சனம் வரலாம், நடிப்பைப் பற்றி எதிர்மறை கருத்து வரலாம். ஆனால் "இந்த ஆளை படத்தில் வைக்கவே கூடாது" என்ற கோப நிலைக்கு விஷயம் போய்விட்டதாக போஸ் வெங்கட் சொல்வது, சினிமா ரசிகர் அரசியல் எவ்வளவு தீவிரமாக மாறியிருக்கிறது என்பதற்கே ஒரு எடுத்துக்காட்டு என்று பலரும் பேசுகிறார்கள். தனது நிலைப்பாட்டை தெளிவாகச் சொன்ன போஸ் வெங்கட், அரசியலுக்கு வந்தவுடன் யாராக இருந்தாலும் கேள்வி கேட்கப்படுவார்கள். அந்த கேள்விக்கு பதில் சொல்லலாம், எதிர் கருத்து சொல்லலாம், விவாதிக்கலாம். ஆனால் அதை விட்டுவிட்டு "குடும்பத்தை இழுத்து பேசுவது, தொழிலை முடக்க முயல்வது, வாய்ப்பை தடுக்க முயல்வது" போன்ற விஷயங்கள் தான் தன்னை அதிகமாக வேதனைப்படுத்துவதாக அவர் கூறியிருக்கிறார். இந்த பேட்டியில் போஸ் வெங்கட் சொல்லிய மற்றொரு முக்கியமான விஷயம், தன்னுடைய அரசியல் பக்கம் பற்றியது. "நான் திமுகவைச் சேர்ந்தவன் என்பது உண்மை. ஆனால் அதனால் திமுக செய்யும் எல்லாவற்றையும் கைக்கொட்டி பாராட்டியவன் இல்லை. எனக்கு ஒத்துக்கொள்ள முடியாத விஷயங்கள் நடந்தால் அதையும் திறந்தவெளியில் விமர்சித்திருக்கிறேன். சமீபத்தில் நடந்த சில கூட்டங்கள், முடிவுகள் பற்றியும் நான் வெளிப்படையாக பேசியிருக்கிறேன்" என்று அவர் குறிப்பிட்டுள்ளார். அதாவது, "நான் ஒரே கட்சியை மட்டும் டார்கெட் பண்ணி பேசுறவனில்லை; எங்கு தவறு தெரிந்ததோ அங்கே பேசியிருக்கிறேன்" என்பதே அவரது கருத்து. ஆனால் விஜய் ரசிகர்கள் தன்னைக் 'எதிரி' மாதிரி பார்க்க ஆரம்பித்துவிட்டார்கள் என்பதுதான் அவரது வேதனை. மேலும் பேட்டியில் அதிகம் அதிர்ச்சியை ஏற்படுத்திய வரிகளில் இதுவும் ஒன்று. "இப்போ சினிமாவிலேயே எனக்கு வாய்ப்பு மறுக்கப்படுகிறது. ஒரு சிலர், 'உங்களுக்கு மீண்டும் நல்ல வாய்ப்பு வேண்டும்னா விஜய் பற்றி நல்லா இரண்டு போஸ்ட் போடுங்க... அப்புறம் எல்லாம் சரியாகிடும்' என்று கூட சொல்கிறார்கள்" என போஸ் வெங்கட் கூறியிருக்கிறார். தனது வாதத்திற்கு வலு சேர்க்கும் வகையில், முன்னதாக நரேந்திர மோடியைப் பற்றியும் தாம் விமர்சனமாக பேசியிருப்பதாக போஸ் வெங்கட் கூறியுள்ளார். "நான் முன்பும் பிரதமர் மோடியை விமர்சித்திருக்கிறேன். அதனால் என் படத்துக்கு விருது வரக்கூடாது, எனக்கு வாய்ப்பு கிடைக்கக்கூடாது என்ற நிலை உருவாகவில்லை. ஆனால் இப்போது ஒரு வகையான சூழல் உருவாகி இருக்கிறது. எங்களை விமர்சித்தால் உங்கள் தொழிலை முடக்குவோம் என்ற மனநிலை மாதிரி தெரிகிறது" என்று அவர் வருத்தப்பட்டுள்ளார். இந்த ஒப்பீடுதான் தற்போது சமூக வலைதளத்தில் பெரிதாக பேசப்படுகிறது. விஜய் ரசிகர்களை குறிவைத்து அவர் இவ்வளவு நேரடியாக பேசியிருப்பது, ரசிகர் தரப்பில் எதிர்வினையையும் தூண்டியுள்ளது. போஸ் வெங்கட் சொல்வது, "எதிர் கருத்து சொல்லுங்கள், விவாதியுங்கள், என்னை தவறு என்று நிரூபியுங்கள் - அதில் பிரச்சனை இல்லை. ஆனால் என் குடும்பத்தையும், என் தொழிலையும், என் வாழ்வாதாரத்தையும் குறிவைக்காதீர்கள்" என்பதுதான். இதுதான் அவருடைய பேட்டியின் மையமான உணர்ச்சி. இப்போது இந்தப் பேட்டி வைரலாகியிருக்கும் நிலையில், விஜய் ரசிகர்கள் இதற்கு என்ன பதில் சொல்வார்கள், போஸ் வெங்கட் மேலும் இதைப் பற்றி பேசுவாரா, அல்லது இது இன்னொரு பெரிய சமூக வலைதள விவாதமாக மாறுமா என்பது தான் அடுத்த கேள்வி.போஸ் வெங்கட் வருத்தம்
விஜய் பற்றிய விமர்சனம்
கையில் எவர்சில்வர் டம்ளரை காட்டி.. என்னங்க பிரேமலதா இப்படி பேசிட்டாங்களே.. நோட்ஸ் எடுத்த விஜய்!
திமுகவையும் விமர்சனம்
மோடியையும் விமர்சித்தேன்
விஜய் பிறந்தநாளில் சன் பிக்சர்ஸ் போட்ட போஸ்ட்.. வந்தாச்சு பஞ்சாயத்து! இதில் கூட உள்கூத்தா? கடுப்பான ரசிகர்கள்