தனுஷின் பெயர் அண்ணாமலை? 'ஓம்' படத்தின் பின்னணி உண்மை சம்பவங்கள் என்ன? ராஜ்குமார் பெரியசாமி ஓபன்

ஓம் தலைப்புக்கு பின்னால் என்ன ரகசியம்?

படத்தின் தலைப்பு வெளியானதிலிருந்து, இது ஆன்மிகம் சார்ந்த படமா என்ற கேள்வி ரசிகர்கள் மத்தியில் எழுந்தது. இதற்கு பதிலளித்த ராஜ்குமார் பெரியசாமி, "'ஓம்' என்ற தலைப்பு ஆன்மிகத்தை நினைவுபடுத்தினாலும், இது முழுக்க உணர்வுகளையும் மனிதர்களின் வாழ்க்கையையும் மையமாகக் கொண்ட கதை. தலைப்புக்கும் கதைக்கும் பல அடுக்குகளில் அர்த்தம் இருக்கிறது. ஆனால் அந்த ரகசியத்தை இப்போது சொல்ல விரும்பவில்லை" என சஸ்பென்ஸ் வைத்தார்.

தனுஷின் கேரியரில் மிகப்பெரிய பட்ஜெட் படம்?

படத்தின் 65 சதவீத படப்பிடிப்பு ஏற்கனவே நிறைவடைந்துள்ளதாக தெரிவித்த ராஜ்குமார் பெரியசாமி, தனுஷ் நடித்த படங்களில் அதிக பட்ஜெட்டில் உருவாகும் படங்களில் இதுவும் ஒன்று என கூறியுள்ளார்.

இதற்கு பெரிய நட்சத்திர பட்டாளம், கதை அமைப்பு மற்றும் சர்வதேச தரத்தில் வடிவமைக்கப்படும் சில முக்கிய காட்சிகள் காரணம் என்றும் அவர் தெரிவித்துள்ளார்.

மம்மூட்டியின் சம்மதம்

இந்த படத்தில் மம்மூட்டி 'கார்த்திகேயன்' என்ற முக்கியமான கதாபாத்திரத்தில் நடித்துவருகிறார். இதுகுறித்து பேசிய ராஜ்குமார் பெரியசாமி, "சூழ்நிலை காரணமாக ஆறு மாதங்களாக மம்மூட்டியை நேரில் சந்திக்க முடியவில்லை. ஆனால் ஒரு நாள் சென்னை வந்திருந்த அவர் கதை கேட்டார். கதையில் இருந்த சந்தேகங்களை கேட்டார். அதன் பிறகு உடனடியாக நடிக்க சம்மதம் தெரிவித்தார்" என்று கூறினார்.

மேலும், தேசிய விருது பெற்ற நடிகர்களான தனுஷ் மற்றும் மம்மூட்டி இருவரும் தங்களது கதாபாத்திரங்களை ஆழமாக புரிந்துகொண்டு நடித்திருப்பதாகவும் அவர் பாராட்டினார்.

செம்மரக் கடத்தல் சம்பவத்துடன் தொடர்பா?

படத்தின் டீசர் வெளியான பிறகு, திருப்பதி பகுதியில் பல ஆண்டுகளுக்கு முன்பு பரபரப்பை ஏற்படுத்திய செம்மரக் கடத்தல் மற்றும் என்கவுண்டர் சம்பவங்களை மையமாக வைத்து இந்த படம் உருவாகிறதா என்ற கேள்வி ரசிகர்களிடம் எழுந்தது.

இதற்கு பதிலளித்த ராஜ்குமார் பெரியசாமி, "சில உண்மை சம்பவங்களின் தாக்கம் இந்த கதையில் இருக்கிறது. ஆனால் இது ஒரு குறிப்பிட்ட சம்பவத்தை மட்டும் மையமாக கொண்ட கதை அல்ல. பல உண்மை நிகழ்வுகள் மற்றும் மனிதர்களின் உணர்வுகளை அடிப்படையாகக் கொண்டு உருவாக்கப்பட்ட திரைக்கதை" என்று விளக்கம் அளித்தார்.

Kara Box Office Day 5: கர படத்தின் 5ஆம் வசூல் இவ்வளவுதானா? தனுஷ் நடிப்பு நல்லா இருந்தும் நிலைமை இப்படி ஆகிடுச்சே!

ராஜ்குமார் பெரியசாமியின் அடுத்த முயற்சி

குறும்படங்கள் மற்றும் தொலைக்காட்சி துறையில் பணியாற்றிய பிறகு சினிமாவுக்கு வந்த ராஜ்குமார் பெரியசாமி, தனது தனித்துவமான கதையம்சங்களால் கவனம் பெற்றவர். குறிப்பாக, சிவகார்த்திகேயன் நடித்த 'அமரன்' திரைப்படம் அவரை முன்னணி இயக்குநர்களின் பட்டியலில் சேர்த்தது.

உண்மை சம்பவங்களை அடிப்படையாக கொண்டு உணர்வுப்பூர்வமான கதைகளை சொல்லும் திறமை ராஜ்குமார் பெரியசாமியின் பலமாக பார்க்கப்படுகிறது. அதே பாணியை இன்னும் பிரம்மாண்டமாக 'ஓம்' திரைப்படத்தில் கொண்டு வர முயற்சித்து வருகிறார்.

பொய் செய்தியால் உடைந்து விட்டேன்.. அந்த சம்பவம் ரொம்ப பாதித்துவிட்டது! நடிகை சாய் பல்லவி உருக்கம்

தனுஷின் கதாபாத்திரம் அண்ணாமலையா?

படத்தின் கதைக்கும் திருவண்ணாமலைக்கும் தொடர்பு இருப்பதை ராஜ்குமார் பெரியசாமி மறுக்கவில்லை. ஆனால் தனுஷ் நடிக்கும் கதாபாத்திரத்தின் பெயர் 'அண்ணாமலை' தானா என்ற கேள்விக்கு அவர் நேரடியாக பதில் அளிக்க மறுத்துவிட்டார்.

அவரின் இந்த பதிலே தற்போது ரசிகர்களிடம் புதிய ஆர்வத்தை ஏற்படுத்தியுள்ளது. திருவண்ணாமலை பின்னணி, உண்மை சம்பவங்களின் தாக்கம், தனுஷ் - மம்மூட்டி கூட்டணி, சாய் பல்லவியின் முக்கிய கதாபாத்திரம் என பல காரணங்களால் 'ஓம்' திரைப்படம் தமிழ் சினிமாவின் மிகவும் எதிர்பார்க்கப்படும் படங்களில் ஒன்றாக மாறியுள்ளது.

அடுத்தடுத்த அப்டேட்கள் வெளியாகும் போதெல்லாம் இந்த படத்தின் மீதான எதிர்பார்ப்பு இன்னும் அதிகரித்து வருவது குறிப்பிடத்தக்கது.