சிறகடிக்க ஆசை: முத்துக்கு இவ்வளவு பெரிய சோதனையா? பைனான்சியர் சொன்ன கண்டிஷன்.. நெஞ்சுவலியில் அண்ணாமலை

சாதாரணமாக சீரியல்களில் ஹீரோ ஒரு பெரிய பணக்காரராக இருந்து பிரச்சனைகளை தீர்ப்பது போல காட்டுவார்கள். ஆனால் சிறகடிக்க ஆசை சீரியலில் முத்து கதாபாத்திரம் மிகவும் யதார்த்தமாக வடிவமைக்கப்பட்டுள்ளது. தன்னிடம் பெரிய சொத்துகளோ, பண பலமோ இல்லாவிட்டாலும் உழைப்பை நம்பி போராடும் ஒரு சாதாரண மனிதனாகவே அவர் காட்டப்படுகிறார். அதனால்தான் ரசிகர்களும் முத்துவின் கேரக்டருடன் அதிகம் ஒன்றிப் போயிருக்கிறார்கள்.

முத்து செய்த செயல்

வீட்டை மீட்க பல லட்சம் ரூபாய் தேவைப்படும் சூழ்நிலையில், யாரிடமும் கைநீட்டி நிற்காமல் தானாகவே ஒரு வழியை கண்டுபிடிக்க முடிவு செய்கிறார் முத்து. தனது பழைய முதலாளியிடம் இருக்கும் ஓடாத, பழுதடைந்த கார்களை வாங்கி அவற்றை புதிதுபோல் மாற்றும் வேலைகளில் முழு மூச்சுடன் இறங்குகிறார். இரவு பகலாக உழைத்து அந்த கார்களை சரிசெய்கிறார். பார்க்கும் யாரும் அது பழைய கார் என்று சொல்ல முடியாத அளவுக்கு புதுப்பித்து விடுகிறார்.

இந்த கார்களை அடமானம் வைத்தோ அல்லது வாடகைக்கு விட்டோ பணம் சம்பாதித்து வீட்டை மீட்டுவிடலாம் என்ற நம்பிக்கையில்தான் முத்து இருக்கிறார். தனது குடும்பம் கஷ்டப்படக்கூடாது, அப்பாவின் கௌரவம் பாதிக்கப்படக்கூடாது என்ற எண்ணமே அவரை தொடர்ந்து ஓட வைக்கிறது.

ஆனால் முத்து இப்படி போராடிக் கொண்டிருக்கும் நேரத்தில், மீனாவின் வீட்டிற்கு ஒரு அதிர்ச்சி செய்தி வருகிறது. வக்கீல் நேரடியாக வந்து ஒரு நோட்டீஸை கொடுக்கிறார். அந்த நோட்டீஸை பார்த்ததும் அனைவரின் முகத்திலும் பதற்றம் தெரிகிறது. ஏனெனில் அது சிந்தாமணி அனுப்பிய சட்ட நோட்டீஸ்.

வக்கீல் நோட்டீஸ்

வீட்டை ஏலத்தில் விடுவதற்கான தேதி அதில் குறிப்பிடப்பட்டிருப்பதாக வக்கீல் கூறுகிறார். இனிமேல் நீதிமன்றம் அல்லது வேறு எந்த வழியிலும் இதை தடுக்க முடியாது. குறிப்பிட்ட தேதிக்குள் பணத்தை திருப்பிக் கொடுத்தால் மட்டுமே வீட்டை காப்பாற்ற முடியும் என்று அவர் தெளிவாக சொல்லிவிடுகிறார்.

இந்த தகவலை கேட்டதும் குடும்பத்தினர் அனைவரும் அதிர்ச்சியில் உறைந்து போகிறார்கள். எப்போதும் தைரியமாக பேசும் விஜயா கூட கதறி அழுகிறார். "நான் இத்தனை வருடம் வாழ்ந்த வீடு என் கையை விட்டு போகப் போகிறதா?" என்ற பயம் அவரை வாட்டுகிறது.

இதற்கிடையில் அண்ணாமலைக்கு ஏற்படும் மன அழுத்தம் உச்சத்தை எட்டுகிறது. குடும்பத்தின் நிலைமையை நினைத்து அவர் திடீரென நெஞ்சுவலியால் அவதிப்படுகிறார். அண்ணாமலையின் நிலையை பார்த்து குடும்பத்தினர் மட்டுமல்ல ரசிகர்களும் கலங்கிப் போகின்றனர்.

அந்த நேரத்தில் வீட்டிற்கு வரும் முத்துவிடம் மீனா மிகவும் உருக்கமாக பேசுகிறார். "எப்படியாவது இந்த வீட்டை காப்பாத்துங்க. அத்தை, மாமாவோட மானமும் மரியாதையும் இந்த வீட்டுலதான் இருக்கு" என்று கண்ணீருடன் கூறுகிறார்.

அதற்கு முத்து, "நீ கவலைப்படாத. நான் இருக்கேன். இன்னும் இரண்டு நாள்ல வீட்டை மீட்டுடுவேன். யாரும் பயப்பட வேண்டாம்" என்று உறுதியாக கூறுகிறார். ஆனால் வெளியில் தைரியமாக பேசும் முத்துவின் உள்ளே எவ்வளவு பெரிய போராட்டம் நடக்கிறது என்பது அவருக்கே தெரியும்.

அசிங்கப்படுத்திய பைனான்சியர்

இதற்குப் பிறகு உடனடியாக ஒரு பைனான்சியரை சந்திக்க செல்கிறார் முத்து. ஏற்கனவே கார்களை தயார் செய்திருப்பதால், அவற்றை வைத்து கடன் வாங்க முடியும் என்ற நம்பிக்கையில் அவர் இருக்கிறார். தனது நிலைமையை முழுவதுமாக எடுத்துச் சொல்லி உதவி கேட்கிறார்.

ஆனால் அவர் எதிர்பார்த்ததற்கு நேர்மாறாக அந்த பைனான்சியர் பேசுகிறார். "உனக்கு நான் பணம் தர முடியாது" என்று நேரடியாக கூறிவிடுகிறார். இதை கேட்ட முத்து அதிர்ச்சியடைகிறார்.

அதற்கான காரணத்தையும் அந்த பைனான்சியர் கூறுகிறார். "பணம் வாங்கும்போது மட்டும் நல்லவனாக இருப்ப. திருப்பி கேட்கும்போது பிரச்சனை பண்ணுவ. முன்னாடி நடந்ததை நான் மறக்கல. ரோட்டுல போற தெரியாத ஆளுக்குக் கூட கடன் கொடுப்பேன். ஆனா உனக்கு மட்டும் கொடுக்க மாட்டேன்" என்று கறாராக பேசுகிறார்.

வீட்டை காப்பாற்ற வேண்டிய கட்டாயத்தில் இருக்கும் முத்து, தனது சுயமரியாதையையும் மறந்து அவரிடம் கெஞ்சுகிறார். ஒரு வழியாக பைனான்சியர் மனம் மாறுவது போல தெரிகிறது. ஆனால் அதற்கும் ஒரு பெரிய நிபந்தனை விதிக்கிறார்.

"உனக்காக யாராவது ஒருவர் சாட்சி கையெழுத்து போட்டால் மட்டுமே நான் கடன் தருவேன்" என்று கூறுகிறார். இந்த ஒரு நிபந்தனை தான் தற்போது முத்துவின் வாழ்க்கையில் மிகப்பெரிய தடையாக மாறியுள்ளது. குடும்பத்திற்காக எப்போதும் ஓடி ஓடி உதவி செய்த முத்துவுக்கு இன்று உதவ யாரும் இல்லை என்ற நிலை உருவாகிறது.

சுந்தரி சீரியல் அனுவுக்கு கிடைத்த பெரிய சந்தோஷம்.. கணவர் உருக்கம்.. சினிமாவை விட்டு விலகியது இதற்காகத்தானா?

வருத்தத்தில் முத்து

சாட்சி கையெழுத்து போட பலரிடம் சென்று கேட்கிறார். நண்பர்கள், தெரிந்தவர்கள், பழக்கமானவர்கள் என பலரையும் சந்திக்கிறார். ஆனால் அனைவரும் ஏதாவது ஒரு காரணம் சொல்லி விலகிச் செல்கின்றனர். ஒருவர்கூட அவருக்காக முன்வரவில்லை.

இதனால் மனம் உடைந்து போகும் முத்து, கடைசியாக தனது பழைய முதலாளியை சந்திக்கிறார். தனது குடும்பம் சந்தித்து வரும் பிரச்சனைகளை சொல்லி வருத்தப்படுகிறார். அப்போது அவரது கண்களில் தெரியும் ஏமாற்றமும் வேதனையும் ரசிகர்களை கலங்க வைத்துள்ளது.

இந்நிலையில் அடுத்த எபிசோடுகளில் என்ன நடக்கப் போகிறது என்ற எதிர்பார்ப்பு அதிகரித்துள்ளது. முத்துவின் பழைய முதலாளி சாட்சி கையெழுத்து போட்டு அவருக்கு உதவுவாரா? பைனான்சியரிடம் இருந்து கடன் கிடைக்குமா? சிந்தாமணி நினைப்பது போல வீடு ஏலத்திற்கு செல்லுமா? அல்லது கடைசி நேரத்தில் முத்து ஒரு அதிரடி திருப்பத்தை கொடுத்து அனைவரையும் காப்பாற்றுவாரா?

முக்கியமாக, இதுவரை எத்தனை தடைகள் வந்தாலும் தோல்வியை ஏற்காத முத்து, இந்த முறையும் வெற்றி பெறுவாரா என்ற கேள்விதான் ரசிகர்கள் மத்தியில் அதிகம் பேசப்பட்டு வருகிறது. அதனால் அடுத்த சில எபிசோடுகள் சிறகடிக்க ஆசை சீரியலின் மிகவும் முக்கியமான மற்றும் உணர்ச்சிகரமான எபிசோடுகளாக அமையும் என்று ரசிகர்கள் எதிர்பார்த்து காத்திருக்கின்றனர்.