வேடன் விவகாரம்... அமைச்சர் சந்திப்பால் மீண்டும் வெடித்த சர்ச்சை! சின்மயி கேள்விக்கு ரசிகர்கள் சொல்வது என்ன?

அமைச்சர்களை சந்தித்த வேடன்

கேரளாவைச் சேர்ந்த ராப் பாடகரான வேடன், சமீபத்தில் தமிழக பள்ளிக்கல்வித்துறை அமைச்சர் ராஜ்மோகன் மற்றும் சமூக நீதித்துறை அமைச்சர் வன்னி அரசை தலைமைச் செயலகத்தில் சந்தித்து பேசினார்.

இந்த சந்திப்பின் புகைப்படங்களை அமைச்சர் வன்னி அரசு தனது சமூக வலைதளப் பக்கத்தில் பகிர்ந்திருந்தார். அமைச்சராக பொறுப்பேற்றதற்கு வேடன் வாழ்த்து தெரிவித்ததாகவும், இலங்கையில் கைது செய்யப்பட்ட ராப் பாடகர் சங்கீதன் விவகாரம் குறித்தும் அவர்கள் பேசியதாகவும் குறிப்பிடப்பட்டது. இந்த பதிவு வெளியாகிய சில மணி நேரங்களிலேயே சமூக வலைதளங்களில் பல்வேறு கருத்துக்கள் குவியத் தொடங்கின.

மீண்டும் குரல் கொடுத்த சின்மயி

அந்த பதிவைப் பார்த்த பாடகி சின்மயி தனது அதிருப்தியை வெளிப்படுத்தினார். தனது சமூக வலைதளப் பதிவில், பாலியல் குற்றச்சாட்டுகளை எதிர்கொண்டவர்களை கையாளும் விதத்தில் தற்போதைய நிர்வாகம் முந்தைய காலங்களில் நடந்த தவறுகளை மீண்டும் செய்யாது என்று நம்புவதாக குறிப்பிட்டிருந்தார்.

அதோடு, கடந்த காலத்தில் வேடனுடன் இணைந்து பணியாற்ற திட்டமிடப்பட்ட ஒரு இசை திட்டம் பின்னர் கைவிடப்பட்டதாகவும், அதன் பின்னர் பல பெண்கள் அவரைப் பற்றிய குற்றச்சாட்டுகளை பகிர்ந்ததாகவும் தெரிவித்திருந்தார். சின்மயியின் இந்த பதிவு வெளியானதும், விவாதம் மீண்டும் சூடுபிடித்தது.

ரசிகர்கள் இரண்டாக பிரிந்தனர்

சமூக வலைதளங்களில் தற்போது இரண்டு விதமான கருத்துக்கள் அதிகமாக பேசப்படுகின்றன. ஒரு தரப்பினர், "ஒருவர் மீது பெண்கள் தொடர்ந்து குற்றச்சாட்டுகளை முன்வைத்தால், அதுகுறித்து விசாரணை நடத்தப்பட வேண்டும். புகார் அளித்தவர்களின் குரலை புறக்கணிக்கக் கூடாது" என்று கூறி சின்மயியின் கருத்துக்கு ஆதரவு தெரிவித்து வருகின்றனர்.

மற்றொரு தரப்பினர், "குற்றச்சாட்டு வேறு... குற்றம் நிரூபிக்கப்படுவது வேறு. சட்டப்படி நிரூபிக்கப்படாத நிலையில் ஒருவரை சமூக ரீதியாக தண்டிப்பது சரியா?" என்று கேள்வி எழுப்புகின்றனர். இதனால் சமூக வலைதளங்களில் கருத்து மோதல் தீவிரமடைந்துள்ளது.

"இப்போதுதான் பேசுகிறீர்களா?" சின்மயியின் பதிவுக்கு கீழ் வந்த ஒரு கருத்து அதிக கவனம் பெற்றது. "இந்த சந்திப்பு நடந்ததற்கு இரண்டு நாட்கள் ஆகிவிட்டது. இப்போதுதான் இதைப் பற்றி பேசுகிறீர்களா?" என்று ஒருவர் கேள்வி எழுப்பியிருந்தார்.

முதல்வர் விஜய் ஆட்சி எப்படி இருக்கு? ஒரே வார்த்தையில் பதில் சொன்ன பாடகர் வேடன்.. இதிலும் சர்ச்சையா?

அதற்கு பதிலளித்த சின்மயி, "நீங்கள் எதிர்பார்க்கும் நேரத்தில் எல்லா தகவல்களும் எனக்கு தெரிந்திருக்க வேண்டும் என்பது அவசியமில்லை" என்று கூறியிருந்தார். இந்த பதிலும் தற்போது சமூக வலைதளங்களில் வைரலாகி வருகிறது.

வேடன் மீது மீண்டும் கவனம்

சமீப காலமாக இசை உலகில் தனக்கென ஒரு இடத்தை பிடித்துள்ள வேடன், குறிப்பாக இளைஞர்கள் மத்தியில் பெரிய ரசிகர் பட்டாளத்தை கொண்டவர். அவரது பாடல்கள் சமூக அரசியல் கருத்துக்களையும், இளைஞர்களின் வாழ்க்கை அனுபவங்களையும் பிரதிபலிப்பதாக ரசிகர்கள் கூறி வருகின்றனர். ஆனால் அதே நேரத்தில் அவரைச் சுற்றி எழுந்த சர்ச்சைகள் அடிக்கடி சமூக வலைதளங்களில் விவாதத்தை கிளப்பி வருகின்றன.

பல நெட்டிசன்கள் தற்போது ஒரு முக்கியமான கேள்வியை முன்வைக்கிறார்கள். "இது வேடன் ஒருவரைப் பற்றிய விவாதம் மட்டும் அல்ல. குற்றச்சாட்டு எழுந்தவர்களை சமூகம் எப்படி அணுக வேண்டும்? புகார் அளித்தவர்களின் குரலுக்கு எவ்வளவு முக்கியத்துவம் தர வேண்டும்? சட்டத்தின் தீர்ப்புக்கு முன்பே சமூக தீர்ப்பு வழங்கலாமா?" என்ற கேள்விகள்தான் இப்போது அதிகமாக பேசப்படுகின்றன.

அடங்காத சர்ச்சை

ஒரு அமைச்சர் சந்திப்பு, ஒரு சமூக வலைதள பதிவு, அதற்கு வந்த எதிர்வினைகள்... இவை அனைத்தும் சேர்ந்து மீண்டும் வேடன் விவகாரத்தை இணையத்தின் பேசுபொருளாக மாற்றியுள்ளன. வேடன் தரப்பில் இதற்கு புதிய விளக்கம் ஏதும் வருமா? சின்மயி தொடர்ந்து இந்த விவகாரம் குறித்து பேசுவாரா? அல்லது இந்த விவாதம் சில நாட்களில் அடங்கி விடுமா? என்பது தெரியவில்லை.

ஆனால் ஒரு விஷயம் மட்டும் உறுதி... வேடன் விவகாரம் இன்னும் முடிவுக்கு வரவில்லை என்பதையே இந்த புதிய சர்ச்சை மீண்டும் நிரூபித்துள்ளது.