கேரளா Amusement park-ல் ஆகாய ஊஞ்சல் உடைந்து தமிழர்கள் உள்பட 7 பேர் காயம்! நடந்தது என்ன?

வியாழக்கிழமை நண்பகல் 2 மணியளவில் இந்த விபத்து நிகழ்ந்துள்ளது. விபத்து நடந்த உடனே, வெஞ்சாரமூடு காவல்துறையினரும், தீயணைப்பு மற்றும் மீட்புப் படையினரும் சம்பவ இடத்திற்கு விரைந்து வந்து தீவிர மீட்புப் பணிகளை மேற்கொண்டனர்.

காயமடைந்தவர்களின் நிலை

விபத்தில் சிக்கியவர்களுக்கு லேசான காயங்கள் முதல் கடுமையான எலும்பு முறிவுகள் வரை ஏற்பட்டுள்ளதாக அதிகாரிகள் தெரிவித்துள்ளனர். பாதிக்கப்பட்டவர்கள் உடனடியாக வெஞ்சாரமூட்டில் உள்ள கோகுலம் மருத்துவக் கல்லூரி மருத்துவமனை உள்ளிட்ட அருகிலுள்ள மருத்துவ மையங்களுக்குக் கொண்டு செல்லப்பட்டனர். அவர்களில் பலத்த காயமடைந்தவர்கள் மேல் சிகிச்சைக்காகத் திருவனந்தபுரம் அரசு மருத்துவக் கல்லூரி மருத்துவமனைக்கு மாற்றப்பட்டுள்ளனர்.

விபத்துக்கான காரணம் என்ன?

தீயணைப்புத் துறை அதிகாரிகள் முதற்கட்ட விசாரணைக்குப் பின் கூறியபோது: "பூங்கா நிர்வாகம் அளித்த தகவலின்படி, ஆகாய ஊஞ்சலின் மையப் பகுதியில் இருந்த முக்கியத் தாங்குத்தூண் (Center Pillar) திடீரென சரிந்ததே விபத்திற்குக் காரணம்.

அதிர்ஷ்டவசமாக, ஊஞ்சலின் சுழற்சி முடியும் தருவாயில் அதன் வேகம் குறைந்திருந்ததால், ஒரு பெரிய உயிர்ச்சேதம் தவிர்க்கப்பட்டுள்ளது."

மறுபுறம், இந்த விபத்திற்குக் கேளிக்கை பூங்காவின் முறையற்ற பராமரிப்பே காரணம் எனப் புகார்கள் எழுந்துள்ளன. ஊஞ்சலின் மையப் பகுதியில் பற்றவைக்கப்பட்டிருந்த (Welding) இணைப்பு உடைந்ததே விபத்துக்குக் காரணம் என முன்னாள் ஊராட்சி உறுப்பினர் அனி தெரிவித்துள்ளார்.

பூங்கா நிர்வாகம் மீது உள்ளூர் மக்கள் சரமாரி குற்றச்சாட்டு
இந்த விபத்தைத் தொடர்ந்து, ஹேப்பிலேன்ட் பூங்கா நிர்வாகத்தின் மீது உள்ளூர் மக்களும், மக்கள் பிரதிநிதிகளும் பல்வேறு அடுக்கடுக்கான குற்றச்சாட்டுகளை முன்வைத்துள்ளனர்:

விதிகள் புறக்கணிப்பு: பூங்கா நிர்வாகம் நீண்டகாலமாகப் பாதுகாப்பு விதிகளை முறையாகப் பின்பற்றுவதில்லை என உள்ளூர் மக்கள் குற்றம் சாட்டியுள்ளனர்.

அலட்சியம்: பாதுகாப்புச் சோதனைகள் குறித்துப் பலமுறை புகார்கள் அளித்தும் எந்தவித நடவடிக்கையும் எடுக்கப்படவில்லை என மணிக்கல் ஊராட்சி உறுப்பினர் இர்ஷாத் தெரிவித்துள்ளார்.

முறையற்ற பராமரிப்பு: விபத்துக்குள்ளான ஊஞ்சல் மிகவும் பழையது மற்றும் முறையாகப் பராமரிக்கப்படாதது ஆகும். 17 பேர் அமரக்கூடிய அந்த ஊஞ்சலில், விபத்து நடந்தபோது 12 பயணிகள் இருந்துள்ளனர். இந்த விபத்தில் தமிழகத்தை சேர்ந்த 5 பேர் காயமடைந்ததாகவும் சொல்லப்படுகிறது.

ஆம்புலன்ஸ் வசதி இல்லை: இவ்வளவு பெரிய பூங்காவில் அவசரக் காலத்திற்குப் பயன்படுத்த ஆம்புலன்ஸ் வாகனம் கூட இல்லை என்றும், காயமடைந்தவர்கள் பிற தனியார் வாகனங்களில்தான் மருத்துவமனைக்கு ஏற்றிச் செல்லப்பட்டனர் என்றும் குற்றம் சாட்டப்பட்டுள்ளது.

விபத்துக்குப் பின்னும் இயங்கிய பூங்கா: விபத்து நடந்த பிறகும் பூங்கா உடனடியாக மூடப்படவில்லை. உள்ளூர் மக்கள் திரண்டு சென்று நேரடியாகப் கொந்தளிப்புடன் நிறுத்தக் கூறும் வரை, பூங்காவில் இருந்த சில ஊஞ்சல்கள் தொடர்ந்து இயக்கப்பட்டுள்ளன.

பள்ளி விடுமுறை மற்றும் பள்ளிகள் திறக்கப்பட உள்ள சூழல் என்பதால், பூங்காவில் வழக்கத்தை விடக் கூட்டம் அதிகமாகக் காணப்பட்டுள்ளது. இதனைப் பயன்படுத்தி, அனுமதிக்கப்பட்ட திறனைத் தாண்டி அதிகப்படியான பார்வையாளர்களைப் பூங்கா நிர்வாகம் அனுமதித்ததே இந்த விபத்திற்கு முக்கியக் காரணியாகப் பார்க்கப்படுகிறது. கடந்த 2000-ஆம் ஆண்டு முதல் இந்தப் பூங்கா இப்பகுதியில் செயல்பட்டு வருகிறது என்பது குறிப்பிடத்தக்கது.