நீலகிரி மாவட்டம் ஊட்டியின் இயற்கை எழில் கொஞ்சும் மலைப்பாதைகளில் ஒன்றான கல்ஹட்டி பகுதியில், ஆள் நடமாட்டம் அதிகமுள்ள அண்ணா நகர் குடியிருப்புக்குள் பிரம்மாண்டமான கழுகு ஒன்று திடீரென தரை இறங்கியது. வழக்கமாக உயரமான மரங்களில் அல்லது மலைமுகடுகளில் காணப்படும் பிணந்தின்னி கழுகு, ஊருக்குள் புகுந்து வீடுகள் மற்றும் கடைகளின் அருகே அமர்ந்ததைக் கண்டு அப்பகுதி மக்கள் மிகுந்த ஆச்சரியமும் அச்சமும் அடைந்தனர்.
அந்த கழுகைப் பார்த்த மக்கள், அது சிறிது நேரத்தில் வனப்பகுதிக்குள் பறந்து சென்றுவிடும் என்று முதலில் கருதினர். ஆனால், நீண்ட நேரமாகியும் அந்தக் கழுகு குடியிருப்புப் பகுதியிலேயே சுற்றித் திரிந்ததால் சந்தேகமடைந்த மக்கள், அதனை உற்றுப் பார்த்தனர். அப்போது அந்தப் பறவையின் முதுகில் ஒரு சிறிய பிளாஸ்டிக் கருவியும், அதன் கால்களில் ஆங்கில எண்கள் பொறிக்கப்பட்ட வளையமும் இருப்பதைக் கண்டு அதிர்ச்சியில் உறைந்தனர்.
ஆராய்ச்சிப் பறவையின் வருகை: அதிர்ச்சியில் உறைந்த ஊட்டி மக்கள் இதுகுறித்து உடனடியாக ஊட்டி வனத்துறையினருக்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த வனத்துறை அதிகாரிகள், அந்தக் கழுகைப் பரிசோதித்தபோது அது சாதாரணக் கழுகு அல்ல, அழிந்து வரும் இனத்தைச் சேர்ந்த பிணந்தின்னி கழுகு என்பதை உறுதி செய்தனர். அதன் முதுகில் பொருத்தப்பட்டிருந்தது அதன் இருப்பிடத்தைக் கண்காணிக்கும் ஜி.பி.எஸ் கருவி என்பதும் தெரியவந்தது. வனத்துறையினர் மேற்கொண்ட விசாரணையில், இது பாம்பே நேச்சுரல் ஹிஸ்டரி சொசைட்டி எனப்படும் புகழ்பெற்ற மும்பை இயற்கை வரலாற்று பாதுகாப்பு அமைப்பால் வளர்க்கப்பட்ட கழுகு என்பது அம்பலமானது. கழுகுகளின் நடமாட்டம் மற்றும் அவற்றின் வாழ்விடப் பகுதிகளை ஆய்வு செய்வதற்காக இந்த அமைப்பினர் மும்பையில் இருந்து கழுகுகளுக்கு ஜி.பி.எஸ் கருவி பொருத்தி வனப்பகுதிக்குள் பறக்க விட்டுள்ளனர். இந்தக் கழுகு கடந்த சில நாட்களாகவே முதுமலை புலிகள் காப்பகத்தைச் சுற்றியுள்ள எப்பாநாடு மற்றும் சீகூர் பகுதிகளில் தென்பட்டுள்ளது. அங்கிருந்து உணவு அல்லது தங்குமிடம் தேடி தற்போது கல்ஹட்டி மலைப்பாதையில் உள்ள அண்ணா நகர் பகுதிக்கு வந்துள்ளது. அங்குள்ள ஒரு டீ கடையின் அருகே அந்தக் கழுகு அமர்ந்திருந்தபோது, பொதுமக்கள் ஆர்வமிகுதியால் அதன் அருகே சென்று செல்ஃபி எடுக்கவும் புகைப்படம் எடுக்கவும் முயன்றனர். நீலகிரி வனப்பகுதியும் அரிய வகை பிணந்தின்னி கழுகுகளும் பிணந்தின்னி கழுகுகள் இயற்கையின் துப்புரவாளர்கள் என்று அழைக்கப்படுகின்றன. காடுகளில் இறந்து கிடக்கும் விலங்குகளின் உடல்களை உண்டு, நோய் பரவாமல் தடுப்பதில் இவற்றின் பங்கு மிக முக்கியமானது. நீலகிரி மற்றும் முதுமலைப் பகுதிகளில் இத்தகைய கழுகுகளின் எண்ணிக்கை குறைந்து வருவதால், மத்திய அரசும் பல்வேறு அமைப்புகளும் இவற்றைத் தீவிரமாகக் கண்காணித்து வருகின்றன. அண்ணா நகரில் சுற்றித் திரியும் இந்தக் கழுகை வனத்துறையினர் தற்போது ரகசியமாகக் கண்காணித்து வருகின்றனர். வனப்பகுதிக்குள் செல்லாமல் குடியிருப்பு பகுதியில் அமர்ந்திருக்கும் இந்த கழுகைத் தொந்தரவு செய்ய வேண்டாம் என வனத்துறையினர் மக்களுக்குக் கடும் எச்சரிக்கை விடுத்துள்ளனர். ஜி.பி.எஸ் கருவியுடன் கூடிய இந்தக் கழுகு ஒருவேளை ஊருக்குள் அசௌகரியமாக உணர்ந்தால், அதனைப் பிடித்து மீண்டும் அடர்ந்த வனப்பகுதிக்குள் விடவும் அவர்கள் திட்டமிட்டுள்ளனர். இது போன்ற ஆராய்ச்சிப் பறவைகள் ஊருக்குள் வருவது அரிதான ஒன்று என்பதால் ஊட்டி மக்களிடையே இது பெரும் விவாதப் பொருளாகியுள்ளது.