தமிழ்நாட்டின் 42 டிகிரி செல்சியஸ் வெயில்.. ராஜஸ்தானின் 52 டிகிரி வெயிலை விட ஆபத்தானது.. ஏன்?

தமிழ்நாட்டின் ஈரப்பதச் சாபம்: தமிழ்நாடு கடலால் சூழப்பட்ட பகுதி என்பதால், நம் காற்றில் ஈரப்பதம் எப்போதுமே மிக அதிகமாக இருக்கும்.

42 டிகிரி... ஆனால் உடலுக்குத் தெரிவது 55 டிகிரி!

காற்றில் ஈரப்பதம் அதிகமாக இருக்கும்போது, நம் உடலில் சுரக்கும் வேர்வை காற்றில் கரையாமல் உடலிலேயே தங்கிவிடும். இதனால் உடலைக் குளிர்விக்கும் இயற்கையின் விசித்திரத் தத்துவம் வேலை செய்யாமல் போகிறது. வானிலை அறிவியலில் இதனை 'வெப்பக் குறியீடு' அல்லது 'உடல் உணரும் உண்மை வெப்ப நிலை' என்று அழைப்பார்கள். அதாவது, காற்றில் இருக்கும் உண்மையான வெப்பநிலையும், ஈரப்பதமும் ஒன்று சேரும்போது மனித உடல் உணரும் உண்மையான உக்கிரம் எவ்வளவு என்பதுதான் இதனுடைய கணக்கு.

உதாரணமாக: தமிழ்நாட்டில் ஒரு நாளில் 42 டிகிரி வெயில் பதிவாகி, காற்றில் ஈரப்பதம் எழுபது விழுக்காடாக இருந்தால், மனித உடல் உணரும் வெப்பத்தின் அளவு 55 டிகிரிக்கும் மேல் இருக்கும்! இது ராஜஸ்தான் பாலைவன வெயிலை விடப் பல மடங்கு கொடூரமானது.

மருத்துவர்கள் எச்சரிக்கும் ஆபத்து

இந்த ஈரப்பதம் கலந்த வெயில் மனித ஆரோக்கியத்திற்குப் பெரும் சவாலாக மாறியுள்ளது. வேர்வை ஆவியாகாத நிலையில், உடலின் உள் உறுப்புகளின் வெப்பநிலை ஆபத்தான அளவிற்கு உயர்கிறது.

இதன் காரணமாகவே தமிழ்நாட்டில் கோடைக்காலத்தில் உடல் சோர்வு, தசைப்பிடிப்பு, மயக்கம் மற்றும் உயிருக்கே ஆபத்தான 'வெப்பவாதம்' (உடல் சூடாகி மயங்குதல்) ஆகியவை அதிக அளவில் ஏற்படுகின்றன.

தப்பிப்பது எப்படி?

தமிழ்நாட்டு வெயில் 'உப்பு மூட்டை' போல உடலை வளைத்துப் பிடிக்கும் தன்மை கொண்டது என்பதால், தாகம் எடுக்காவிட்டாலும் தொடர்ந்து நல்ல தண்ணீர், இளநீர், மோர் மற்றும் எலுமிச்சை சாறு போன்றவற்றை அருந்த வேண்டும் என்று மருத்துவர்கள் எச்சரிக்கிறார்கள். காலை பதினொரு மணி முதல் மதியம் மூன்றரை மணி வரை தேவையற்ற பயணங்களைத் தவிர்ப்பதே இந்த வெப்ப அரக்கனிடமிருந்து நம்மைக் காத்துக் கொள்ளும் எளிய வழியாகும்.