முகத்தில் தெளித்த சாரல்...

நான் என் வீட்டை சாவகாசமாக வைத்திருக்கிறேன்
எனவே கவலைப்படாதீர்கள்
சிலந்திகளே ---இஸ்ஸா

Dont worry spiders
I keep houses casually
ISSA

நீங்கள் சிலரைப் பார்க்கலாம்
கம்ப்யூட்டரில் புரோகிராம் செய்தது போல அவர்கள் வாழ்க்கை
எந்த மணியில் என்ன செய்யவேண்டும்
எத்தனை மணிக்கு சாப்பிட வேண்டும்-
எப்போது தூங்க வேண்டும்
என் முன் கூட்டிய நிர்ணயித்தபடி நடக்கும்.

அவர்கள் உணவின் அளவும்
உணவின் நேரமும்
சிறிது பிறழ்ந்தாலும் அவர்களுக்குக் கோபம்
மூக்கை முந்திக்கொண்டு வரும்-
முகம் சிவந்து போகும்---

அவர்கள் கவனம் எல்லாம் கடிகாரமுள்ளின் மீதே
சகலநேரமும் படிந்திருக்கும்
ஒவ்வொரு அசைவிலும் நிமிடங்களின் நெருக்கடி நிற்கும்.

பஞ்சாங்கத்தின் படி வாழ்வதும்,
கடிகாரத்தின் படி இருப்பதும்
ஒரே திசையை நோக்கிய
வெவ்வேறு வகைப் பயணங்கள்.

நமக்கு எஜமானர்களாக
கடிகாரம் ஆனாலோ;மது ஆனாலோ:
இரண்டுமே ஒரே மாதிரியான போதைகள்தான்.

வாழ்க்கை இறுகிப்போவது அல்ல - பாறையைப்போல
பாறையில் கூட மென்மை கலக்காத பாறை
சிற்பம் செய்யப் பயன்படாது.