புரூஸ் லீயின் 60-வது பிறந்த நாள்: ஹாங்காங்கில் குவியும் ரசிகர்கள்
ஹாங்காங்க்:
மறைந்த குங்க்பூ வீரர் புரூஸ் லீ யின் 60 வது பிறந்த நாளை, அவரது ரசிகர்கள் ஹாங்காங்கில் ஒரு மாதத்திற்கு விமரிசையாகக் கொண்டாடவுள்ளனர்.
உலகப் புகழ் பெற்ற குங்க்பூ வீரர் புரூஸ் லீ. இவர் பல திரைப்படங்களில் நடித்து தனது கராத்தே வித்தைகள் மூலம் லட்சக்கணக்கான ரசிகர்களைப் பெற்றவர்.1973 ம் ஆண்டு கவ்லான் நகரில் தனது நண்பர் வீட்டில் தங்கியிருக்கும் போது மர்மமான முறையில் இறந்தார். அவர் எப்படி இறந்தார் என்பது இன்றுவரை புரியாத புதிராக உள்ளது. புரூஸ்லீயின் மனைவி பெயர் லிண்டா. சான்பிரான்சிஸ்கோவில் வசித்து வருகிறார்.
நவம்பர் 27 ம் தேதி புரூஸ் லீ யின் 60-வது பிறந்தநாள் வருகிறது. இதையொட்டி அவரது ரசிகர்கள், ஹாங்காங் நகரில் ஒரு மாதத்திற்கு விழாகொண்டாடுகின்றனர். விழாவில் புரூஸ் லீயின் பல படங்கள் திரையிடப்படுகின்றன.
திங்கள்கிழமை இந்த திரை விழா தொடங்கியது. தொடக்க விழாவில் புரூஸ் லீ 10 வயதாக இருக்கும் போது நடித்த திரைப்படமான "தி கிட்திரையிடப்பட்டது. அவரது 60 பிறந்த தினமான நவம்பர் 27 ம் தேதி " புரூஸ் லீ: தி வாரியர் ஜர்னி என்ற டாகுமென்டரி படம் காண்பிக்கப்படவுள்ளது.
டிசம்பர் 17 ம் தேதி வரை இந்தத் திரைப்பட விழா நடக்கும். விழாவில் புரூஸ் லீ யின் கராத்தே விருந்துகளை உள்ளடக்கிய தி டிராகன், ஃபிஸ்ட் ஆப் ஃபரிமற்றும் தி பிக் பாஸ் ஆகிய படங்கள் திரையிடப்படவுள்ளன.
ஹாங்காங் நகர பொழுதுபோக்கு மற்றும் கலாச்சார அமைப்பு இயக்குநர் லியோங் கூறுகையில், புரூஸ் லீ யின் பிறந்த நாளையொட்டி அமெரிக்கா, ஐப்பான்,ஐரோப்பிய நாடுகளிலிருந்து ஏராளமான ரசிகர்கள் ஹாங்காங் வந்துள்ளனர்.
இது வெறும் திரைப்பட விழா மட்டுமல்ல. புரூஸ் லீ யின் திரைப்படங்கள் குறித்து ஆராய்ச்சி நடத்துபவர்களுக்கும் நல்ல வரப்பிரசாதமாகும் என்றார்.