மேலும் 3 மாகாணங்களில் ஓபாமாவுக்கு வெற்றி

வாஷிங்டன்: வாஷிங்டன் உள்ளிட்ட மாகாணங்களில் நடந்த ஜனநாயகக் கட்சி வேட்பாளர் தேர்வுக்கான வாக்கெடுப்பில் பாரக் ஓபாமா 3 மாகாணங்களில் வெற்றி பெற்றார். குடியரசுக் கட்சித் தரப்பில் மைக் ஹக்கபி 2 மாகாணங்களில் வென்றார்.

வாஷிங்டன், லூசியானா, நெப்ரஸ்கா ஆகிய மாகாணங்களில் நடந்த வாக்கெடுப்பில் ஓபாமாவுக்கு வெற்றி கிடைத்தது. இது ஹில்லாரிக்கு பின்னடைவை ஏற்படுத்தியுள்ளது.

மைக் ஹக்கபிக்கு லூசியானா, கான்சாஸ் ஆகிய மாகாணங்களில் வெற்றி கிடைத்தது. இருப்பினும் இதனால் ஏற்கனவே நல்ல முன்னணியில் உள்ள ஜான் மெக்கெய்னுக்கு பெரிய அளவில் பாதிப்பு ஏற்படாது.

ஓபாமாவுக்கு வாஷிங்டன் மற்றும் நெப்ரஸ்காவில் எளிதான வெற்றி கிடைத்தது. இங்கு 60 சதவீத வாக்குகளை அவர் பெற்றார். லூசியானாவிலும் ஹில்லாரியை அவர் எளிதில் தோற்கடித்தார்.

செவ்வாய்க்கிழமை விர்ஜீனியா, மேரிலாண்ட், வாஷிங்டன் டிசி ஆகிய மாகாணங்களில் வாக்கெடுப்பு நடைபெறவுள்ளது. இதிலும் வெற்றி பெற முடியும் என்று ஓபாமா நம்பிக்கை தெரிவித்துள்ளார்.