இன்போசிஸ் நிகர லாபம் ரூ. 4,659 கோடி
பெங்களூர்: இந்திய சாப்ட்வேர் நிறுவன ஜாம்பவானான இன்போசிஸ் டெக்னாலஜிஸ் 2007-08 நிதியாண்டில் நிகர லாபமாக ரூ.4,659 கோடியை திரட்டியுள்ளது.
கடந்த மார்ச் 31 உடன் முடிந்த 2007-08 நிதியாண்டின் இறுதி காலாண்டில் ரூ.1,249 கோடி நிகர லாபம் அடைந்துள்ளதாக இன்போசிஸ் டெக்னாலிஜிஸ் நிறுவனம் அறிவித்துள்ளது. முந்தைய காலாண்டு இறுதியில் ரூ.1,231 கோடி மட்டுமே நிகரலாபமாக ஈட்டியிருந்தது. இதன்மூலம் 3 மாதங்களுக்குள் 9 சதவீத வளர்ச்சியை அந்த நிறுவனம் அடைந்துள்ளது.
முந்தைய 2006-07 நிதியாண்டில் ரூ.3,856 கோடியை நிகரலாபமாக ஈட்டிய இன்போசிஸ் நிறுவனம் சென்ற நிதியாண்டில் ரூ.4,659 கோடியை ஈட்டியுள்ளது குறிப்பிடத்தக்கது.
அதேபோல் சென்ற நிதியாண்டின் நிகர விற்பனை ரூ.16,692 கோடி என்றும், அதற்கு முந்தைய நிதியாண்டில் ரூ.13,893 கோடி என்றும் இன்போசிஸ் தெரிவித்துள்ளது. கடந்த ஆண்டில் மட்டும் கூடுதலாக 5,947 ஊழியர்களை நியமித்துள்ளது.
இந்நிலையில் 2008-09 நிதியாண்டில் இருந்து நிகர லாபத்தில் பங்குதாரர்களுக்கு வழங்கப்படும் பங்கு ஆதாய விகிதத்தை 30 சதவீதம் வரை அளிக்கப் போவதாக இன்போசிஸ் முடிவு செய்துள்ளது.
இன்போசிஸ் பங்குதாரர்களுக்கு தற்போது ரூ.5 முகப்பு மதிப்பு பங்குக்கு தலா இறுதி ஆதாயமாக ரூ.7.25ம், சிறப்பு ஆதாயமாக ரூ.20ம் வழங்கவுள்ளது. வரும் நிதியாண்டில் தனது நிகர வர்த்தகம் ரூ.20000 கோடியை எட்டும் என்று இன்போசிஸ் கணித்துள்ளது.