'யுஎப்ஓ'?: பறக்கும் பெண் ணால் மெக்சிகோவில் பரபரப்பு
கடந்த 2006ம் ஆண்டு மே 15ம் தேதி இந்த மர்ம உருவம் வீடியோவில் பதிவாகியுள்ளது. மெக்சிகோவின் நுவோ லியான் மலைப் பகுதியில்தான் இந்த காட்சி பதிவாகியுள்ளது. விண்ணிலிருந்து பறந்தபடி வந்து இறங்குகிறது அந்த மர்ம உருவம். பார்க்க பெண் போலவே அது இருக்கிறது.
மலையில் இறங்கும் அந்த உருவம், அப்படியே மலைத் தொடரில் அங்கிமிங்கும் பறக்கிறது. ஒரு மலையின் உச்சியில் நடந்தபடி செல்லும் அந்த உருவம் ஒரு கட்டத்தில் அப்படியே அந்தரத்தில் நிற்கிறது.
2006ம் ஆண்டு இந்த உருவம் அடிக்கடி பறந்து சென்றதை அப்பகுதி மக்கள் பார்த்துக் கூறினர். ஆனால் அதை யாரும் நம்பவில்லை. ஆனால் மே 15ம் தேதிதான் இந்தக் காட்சி வீடியோவில் பதிவாகியது. அதன் பின்னரே இது பரபரப்பை ஏற்படுத்தியது.
இந்த மர்ம உருவம் யார் என்பதில் பெரும் சர்ச்சை நிலவியது. ஆனால் இது பெண்தான் என்று பல ஆய்வாளர்களும் அடித்துக் கூறுகின்றனர். இந்த வாதம் உண்மையாக இருக்கக் கூடும் என்று மெக்சிகோவைச் சேர்ந்த பறக்கும் பொருட்கள் குறித்த ஆய்வாளர் அன்னா லூசியா கூறியுள்ளார்.
இதுகுறித்து அவர் கூறுகையில் அது ஒரு பெண்ணாக இருக்கக் கூடும். தலையில் அந்தப் பெண் தொப்பி அணிந்துள்ளார். இது நிச்சயம் மனித உரும்தான். இந்தக் காட்சியை 40 பேர் நேரில் பார்த்துள்ளனர். நுவோயிலோனைச் சேர்ந்த பறக்கும் பொருள் குறித்த ஆய்வு கிளப்பைச் சேர்ந்தவர்கள்தான் இதை வீடியோவில் படமாக்கியுள்ளனர் என்கிறார்.
இதையடுத்து இந்த மர்ம உருவம் குறித்த பரபரப்பு அதிகரித்துள்ளது. அந்த உருவம் உண்மையிலேயே பெண்தானா, அப்படியானால் அவர் எங்கிருந்து வந்தார், வேற்றுகிரக வாசியா என்ற ரீதியில் விசாரணைகளும், ஆய்வுகளும் முடுக்கி விடப்பட்டுள்ளன.