தேர்தலில் திமுக கூட்டணி தோற்கும்: இல.கணேசன்
ஈரோடு: நிர்வாக தவறுகளை மறைக்க, ஒரு ரூபாய் அரிசி திட்டத்தை அறிவித்துள்ளது திமுக அரசு. ஆனால் வரும் நாடாளுமன்ற தேர்தலில் திமுக கூட்டணி தோற்பது உறுதி என்று பாஜக மாநில தலைவர் இல.கணேசன் கூறினார்.
இதுகுறித்து ஈரோட்டில் செய்தியாளர்களிடம் அவர் கூறுகையில், காங்கிரஸ் அரசு மீது நம்பிக்கை இல்லை தீர்மானம் கொண்டு வந்தபோது பல ஜகஜால வேலைகளை செய்து வெற்றி பெற்றனர். தமிழகத்தில் திமுக கூட்டணியில் இருந்து பாமக வெளியேறியதை அடுத்து இங்கும் அதே நிலைதான்.
திமுக அரசுக்கு எதிராக அதிமுக நம்பிக்கை இல்லா தீர்மானம் கொண்டு வந்தால் திமுக ஆட்சி கவிழ்ந்துவிடும். அதை நாங்கள் வரவேற்கிறோம். மக்களின் பல்வேறு பிரச்சனைகளை தீர்க்க திமுக அரசு தவறிவிட்டது. தவறை மறைக்கத்தான் ஒரு ரூபாய்க்கு ஒரு கிலோ அரிசி, இலவச டிவி என வழங்கி மக்களை ஏமாற்றி வருகிறது.
எதை செய்தாலும், வரும் நாடாளுமன்ற தேர்தலில் திமுக கூட்டணி தோற்பது உறுதி. லோக்சபாவில் இடதுசாரிகள் நம்பிக்கை இல்லா தீர்மானத்தை கொண்டு வந்ததை போல நாங்களும் கொண்டு வருவோம்.
இதுவரை எந்த கட்சியுடன் கூட்டணி வைப்பது என்பது குறித்து இறுதி முடிவு எடுக்கப்படவில்லை. தமிழகத்தில் வளர்ந்து வரும் கட்சியாக தேமுதிக உள்ளது. அதன் தலைவர் விஜயகாந்த் நல்ல நண்பர். தேமுதிகவுடன் கூட்டணி இல்லை என்று கூற முடியாது என்றார்.