டாடா ஸ்டீல் முத்துராமனை 'பெண்ணாக்கிய' தேர்தல் ஆணையம்!
ஜாம்ஷெட்பூர்: டாடா ஸ்டீல் நிறுவன நிர்வாக இயக்குநர் பி.முத்துராமனின் பாலினத்தை பெண் என மாற்றி தேர்தல் ஆணையம் குளறுபடி செய்துள்ளது. அவரது மனைவியை ஆண் என குறிப்பிட்டு அகோரம் செய்துள்ளனர்.
ஜார்க்கண்ட் மாநிலத்தில் புகைப்பட வாக்காளர் அடையாள அட்டை தயாரிக்கும் பணியில் தேர்தல் ஆணையம் மும்முரமாக உள்ளது.
ஆனால் இந்தப் பணியில் பலவித குளறுபடிகள் இருப்பது வெட்டவெளிச்சமாகியுள்ளது.
கிழக்கு சிங்க்பம் மாவட்டத்தில் டாடா ஸ்டீல் நிர்வாக இயக்குநர் முத்துராமன் மற்றும் அவரது குடும்பத்தினருக்கு ஓட்டு உள்ளது.
இங்கு தயாரிக்கப்பட்ட புகைப்பட வாக்காளர் பட்டியலில் முத்துராமனின் பாலினம் பெண் என்றும், அவரது மனைவி
ஆண் என்றும் கூறி குழப்பியுள்ளனர் தேர்தல் அதிகாரிகள்.
வாக்காளர் பட்டியலின் 193வது பக்கத்தில் முத்துராமனின் புகைப்படம் ஒட்டப்பட்டுள்ளது. அவரது பெயர் விமலா தேவி என்றும், பெண் என்றும் குறிப்பிட்டுள்ளனர்.
அதே பட்டியலில், முத்துராமனின் மனைவி ஸ்வாதி முத்துராமனை, துத்நாத் சாஹ் என்றும், ஆண் என்றும் குறிப்பிட்டு குழப்பம் செய்துள்ளனர்.
இது மிகப் பெரிய தவறு என்று மாவட்ட துணை தேர்தல் அதிகாரி விபின் பிஹாரி கூறியுள்ளார். புகைப்பட வாக்காளர் அட்டைகளை தயாரித்தவர்கள் செய்த குழப்பமே இது என்றும் அவர் கூறியுள்ளார்.
விமலாதேவிக்கும், முத்துராமனுக்கும் ஒரே வரிசை எண்ணைக் கொடுத்ததால் வந்த குழப்பம் இது.
இந்தத் தவறுகள் தற்போது திருத்தப்பட்டு வருவதாக பிஹாரி தெரிவித்துள்ளார்.