மக்களவை தொகுதி அறிமுகம்-31: சிவகங்கை
இந்தத் தொகுதியில் 6 முறை வெற்றி பெற்று எம்.பி ஆகியுள்ளார் ப.சிதம்பரம். இத்தொகுதியின் மூலமாக மத்திய அமைச்சரவையில் இடம் பெறும் வாய்ப்பையும் பெற்றார் ப.சிதம்பரம். ஆரம்பத்தில் நிதித்துறை இணை அமைச்சராக இருந்தார். பின்னர் கேபினட் அமைச்சராக உயர்ந்தார். தற்போது உள்துறை அமைச்சராக இருக்கிறார்.
சிதம்பரத்திற்கு மட்டுமல்லாமல், காங்கிரஸுக்கும் அசைக்க முடியாத கோட்டையாக திகழ்கிறது சிவகங்கை.
முன்பு இத்தொகுதியில், திருமயம், திருப்பத்தூர், காரைக்குடி, திருவாடானை, இளையாங்குடி, சிவகங்கை ஆகிய சட்டசபைத் தொகுதிகள் இருந்தன.
தற்போது தொகுதி மறு சீரமைப்பின்படி, திருமயம், ஆலங்குடி, காரைக்குடி, திருப்பத்தூர், சிவகங்கை, மானாமதுரை (தனி) ஆகிய தொகுதிகள் இடம் பெற்றுள்ளன.
இவற்றில் திருமயம், ஆலங்குடி ஆகியவை புதுக்கோட்டை மாவட்டத்தைச் சேர்ந்தவை. இளையாங்குடி, திருவாடானை ஆகியவை வெளியேறியுள்ளன.
சட்டசபைத் தொகுதிகளைப் பொறுத்தமட்டில், திருமயத்தில்
காங்கிரஸின் சுப்புராம், ஆலங்குடியில் சிபிஐயின் ராஜசேகரன், காரைக்குடியில் காங்கிரஸின் சுந்தரம், திருப்பத்தூரில் திமுகவின் பெரியகருப்பன், சிவகங்கையில், சிபிஐயின் குணசேகரன், மானாமதுரையில், அதிமுகவின் குணசேகரன் ஆகியோர் உறுப்பினர்களாக உள்ளனர்.
இதுவரை எம்.பி. ஆக இருந்தவர்கள்
1967-71 - தா.கிருட்டிணன் - திமுக.
1971-77 - தா.கிருட்டிணன் - திமுக.
1977-80 - பெரியசாமி தியாகராஜன் - அதிமுக.
1980-84 - ஆர்.வி.சுவாமிநாதன் - காங்.
1984-89 - ப.சிதம்பரம் - காங்.
1989-91 - ப.சிதம்பரம் - காங்.
1991-96 - ப.சிதம்பரம் - காங்.
1996-98 - ப.சிதம்பரம் - தமாகா.
1998-99 - ப.சிதம்பரம் - தமாகா.
1999-04 - சுதர்சன நாச்சியப்பன் - காங்.
2004 - ப.சிதம்பரம் - காங்.
கடந்த தேர்தல் நிலவரம்
ப.சிதம்பரம் (காங்.) - 4,00,393
கருப்பையா (அதிமுக) - 2,37,668
வெற்றி வித்தியாசம் - 1,62,725 வாக்குகள்.