'தப்பிப் பிழைத்தவர்கள்': ப.சிக்கு 2வது இடம்!
சென்னை: குறைந்த வாக்கு வித்தியாசத்தில் வெற்றி பெற்ற தமிழக எம்.பிக்கள் வரிசையில் உள்துறை அமைச்சர் ப.சிதம்பரத்திற்கு 2வது இடம் கிடைத்துள்ளது. முதலிடத்தில் இருப்பவர் அதிமுகவின் விழுப்புரம் உறுப்பினராக தேர்வாகியுள்ள எம். ஆனந்தன்.
தமிழகத்திலேயே மிகவும் குறைந்த வாக்கு வித்தியாசத்தில் வென்றவர் ஆனந்தன்தான். விழுப்புரம் தொகுதியில் இவர் வெற்றி பெற்றுள்ளார். தன்னை எதிர்த்துப் போட்டியிட்ட விடுதலைச் சிறுத்தைகள் வேட்பாளர் சாமித்துரையை 2797 வாக்குகளில் தோற்கடித்துள்ளார் ஆனந்தன். இவர் முன்னாள் தமிழக அமைச்சர் ஆவார்.
ப.சிதம்பரம் 2வது இடத்தில்..
உள்துறை அமைச்சரும், தேசிய அளவில் பிரபலமான அரசியல்வாதிகளில் ஒருவருமான, காங்கிரஸ் கட்சியின் நிதி மேதை எனப் புகழப்படுபவருமான ப.சிதம்பரம் தப்பிப் பிழைத்து ஜெயித்தவர்கள் வரிசையில் 2வது இடத்தில் உள்ளார்.
8 முறை சிவகங்கையில் போட்டியிட்ட சிதம்பரம் 7முறை இங்கு வெற்றி பெற்றுள்ளார். ஆனால் இந்த முறைதான் மிகக் குறைந்த வாக்கு வித்தியாசத்தில் வென்றுள்ளார் சிதம்பரம்.
கடந்த ஆறு முறையும் லட்சக்கணக்கான வாக்குகள் வித்தியாசத்தில் ஜெயித்து வந்தவர் சிதம்பரம் என்பது குறிப்பிடத்தக்கது. ஆனால் இந்த முறை, தலை தப்பியது தம்பிரான் புண்ணியம் என்ற கணக்கில் அவர் வெற்றி பெற்றுள்ளார்.
இம்முறை நடந்த தேர்தலில் வாக்கு எண்ணிக்கையின்போது சிதம்பரத்தை எதிர்த்துப் போட்டியிட்ட அதிமுகவின் ராஜ கண்ணப்பன் தான் வெற்றி பெற்றதாக முதலில் கூறப்பட்டது. ஆனால் ஆலங்குடி சட்டசபைத் தொகுதி வாக்குகளை திரும்ப எண்ண வைத்து அதன் பின்னர் சிதம்பரம் ஜெயித்து விட்டதாக அறிவிக்கப்பட்டது.
ராஜ கண்ணப்பனை ஜஸ்ட் 3354 வாக்குகள் வித்தியாசத்தில்தான் வென்றுள்ளார் ப.சிதம்பரம்.
திருச்சி காங்கிரஸ் வேட்பாளர் சாருபாலா தொண்டமானை விட 4335 வாக்குகள் வித்தியாசத்தில் வீழ்த்திய அதிமுக வேட்பாளர் குமார் இந்த வரிசையி்ல் 3வதாக உள்ளார்.
அதிக வாக்கு வித்தியாசம்-திமுக முன்னணி..
அதிக வாக்குகள் வித்தியாசத்தில் வென்ற முதல் மூன்று பேருமே திமுகவைச் சேர்ந்தவர்கள்.
திருவண்ணாமலையில் வென்ற வேணுகோபால், பாமக வேட்பாளர் காடுவெட்டி குருவை 1,48,300 வாக்குகள் வித்தியாசத்தில் வீழ்த்தி முதலிடத்திலும், மதுரையில் 1,40,985 வாக்குகள் வித்தியாசத்தில் வென்ற மு.க.அழகிரி 2வது இடத்திலும், தர்மபுரியில் 1,35,942 வாக்குகள் வித்தியாசத்தில் வென்ற தாமரை செல்வன் மூன்றாவது இடத்திலும் உள்ளனர்.