ஸ்டாலினுக்கு துணை முதல்வர் பதவி?
சென்னை: அமைச்சர் ஸ்டாலின் விரைவில் துணை முதல்வராக்கப்படலாம் என்று தெரிகிறது.
இதற்கு வசதியாக மதுரையில் மு.க.அழகிரிக்கு கேபினட் அமைச்சர் பதவியும், கனிமொழிக்கும் மத்திய இணையமைச்சர் பதவியும் அளிக்கப்படலாம் என்று கூறப்படுகிறது.
முதல்வர் கருணாநிதியின் உடல் நலம் பாதிக்கப்பட்டுள்ள நிலையில் அவரது பணிகளை ஏற்கும் வகையில், ஸ்டாலின் ஆதரவாளர்களின் நீண்ட நாள் கோரிக்கைப்படி அவருக்கு துணை முதல்வர் பதவி கொடுக்கப்படலாம் என்று தெரிகிறது.
முதல்வரால் பிரச்சாரம் செய்ய முடியாத நிலையில் இந்தத் தேர்தலில் தமிழகம் முழுவதும் பிரசாரம் செய்த ஒரே திமுக தலைவர் ஸ்டாலின் தான் காரணம் என்பது குறிப்பிடத்தக்கது. அதிமுக பொதுச் செயலாளர் ஜெயலலிதா போன தொகுதிகளுக்கும் இடங்களுக்கும் அதே நாளிலோ அல்லது அடுத்த நாளோ சென்று அவரது குற்றச்சாட்டுகளுக்கு பதில் சொல்லி பிரச்சாரம் செய்தார் ஸ்டாலின்.
கிட்டத்தட்ட 2 மாதம் ஜெயலலிதாவி்ன் சுற்றுப் பயணத் திட்டம் தான் ஸ்டாலினின் பயணத் திட்டமாகவும் இருந்தது.
மேலும் கருணாநிதியால் பிரச்சாரத்தை, தேர்தல் பணிகளை ஒருங்கிணைக்க முடியாத நிலை இருந்ததால் அதை தென் மாவட்டங்கள் தவிர மற்ற இடங்களில் முழுமையாக ஏற்றுக் கொண்டதும் ஸ்டாலின் தான். தென் மாவட்டங்களில் அழகிரி தான் இதை ஒருங்கிணைத்தார்.
திமுக தொடர்ந்து இரு மக்களவைத் தேர்தல்கள், ஒரு சட்டசபைத் தேர்தல், உள்ளாட்சித் தேர்தல் என நான்கு தேர்தல்களில் வென்றுள்ள நிலையில் ஸ்டாலினை துணை முதல்வராக்க இதுவே சரியான தருணம் என முதல்வர் கருணாநிதியும் மூத்த தலைவர்களும் கருதுவதாகத் தெரிகிறது.