கருணாநிதி தலைமையில் 16ம் தேதி திமுக எம்.எல்.ஏக்கள் கூட்டம்
சென்னை: முதல்வர் கருணாநிதி தலைமையில், வருகிற 16ம் தேதி திமுக எம்.எல்.ஏக்கள் கூட்டம், திமுக இளைஞர் அணித் தலைமையகமான அன்பகம், அண்ணா மன்றத்தில் நடைபெறுகிறது.
தமிழக சட்டசபையின் நீடிக்கப்பட்ட பட்ஜெட் கூட்டத் தொடர் வருகிற 17ம் தேதி தொடங்குகிறது. பாராளுமன்ற தேர்தல் வெற்றிக்கு பிறகு நடக்கும் முதல் கூட்டத்தொடர் இது என்பது குறிப்பிடத்தக்கது.
இந்த நிலையில் திமுக எம்.எல்.ஏக்கள் கூட்டம் கூட்டப்பட்டுள்ளது.
இது தொடர்பாக அரசு தலைமை கொறடா அர.சக்கரபாணி வெளியிட்டுள்ள அறிக்கையில், முதல்வர் கருணாநிதி தலைமையில் தி.மு.க. சட்டமன்ற உறுப்பினர்கள் கூட்டம் 16-6-2009 செவ்வாய்க்கிழமை மாலை 5 மணிக்கு சென்னை அண்ணாசாலை, அன்பகத்தில் உள்ள அண்ணா மன்றத்தில் நடைபெறும்.
தி.மு.க. சட்டமன்ற உறுப்பினர்கள் அனைவரும் தவறாமல் கலந்து கொள்ளுமாறு கேட்டுக்கொள்கிறேன் என்று கூறப்பட்டுள்ளது.
முதல் முறையாக அன்பகத்தில்..
வழக்கமாக திமுக எம்.எல்.ஏக்கள் கூட்டம் அறிவாலயத்தில் உள்ள கலைஞர் அரங்கில் நடைபெறும். ஆனால் முதல் முறையாக அன்பகம், அண்ணா மன்றத்தில் அது நடைபெறவுள்ளது.
அன்பகம்தான் திமுக இளைஞர் அணியின் தலைமையகமாகும். இளைஞர் அணியின் செயலாளராக உள்ள மு.க.ஸ்டாலின் தற்போது துணை முதல்வராகியுள்ளார்.
துணை முதல்வரான பின்னர் நடைபெறும் முதல் திமுக எம்.எல்.ஏக்கள் கூட்டம் அன்பகத்தில் நடைபெறுவது குறிப்பிடத்தக்கது.