கொல்கத்தா நைட் ரைடர்ஸ் அணிக்கு பயிற்சியாளர் அக்ரம்!
தென் ஆப்ரிக்காவில் நடந்த ஐபிஎல் சீசன் 2 தொடரில் ஷாருக் கானின் கொல்கத்தா நைட் ரைடர்ஸ் அணி கடைசி இடத்தை பிடித்து ஏமாற்றம் அளித்தது.
இதையடு்த்து அணியின் பயிற்சியாளராக இருந்த ஆஸ்திரேலியாவின் ஜான் புக்கானன் அதிரடியாக நீக்கப்பட்டார்.
தற்போது கொல்கத்தா அணிக்கு புதிய பயிற்சியாளரை கண்டறியும் பணிகள் மும்முரமாக நடந்து வருகிறது. இந்நிலையில் ஷாருக் கான் இது தொடர்பாக, பாகிஸ்தான் முன்னாள் கேப்டன் வாசிம் அக்ரமுடன் தொலைபேசியில் பேசியுள்ளார்.
இதை வாசிம் அக்ரமும் உறுதி செய்துள்ளார். அவர் இந்த வார கடைசியில் ஷாருக் கானை சந்தித்து இது குறித்து பேச இருக்கிறார். கொல்கத்தா அணியின் கேப்டன் கங்குலியும், அக்ரமும் நல்ல நண்பர்கள் என்பதால் இருவருக்கும் இடையே நன்கு ஒத்துபோகும். இதனால் அக்ரம் தான் பயிற்சியாளராக நியமிக்கப்படுவார் என தெரிகிறது.
முன்னதாக கொல்கத்தா அணி நிர்வாகம் இந்திய வீரர் டபிள்யு வி ராமன், ஆஸ்திரேலியாவின் மைக்கேல் பெவன், இங்கிலாந்தின் டெர்மட் ரீவ் ஆகியோரிடம் கடந்த 23 ம் தேதி நேர்முக தேர்வு நடத்தியுள்ளது.
இவர்களை தவிர கொல்கத்தா அணியின் பயிற்சியாளர் போட்டியில் இங்கிலாந்தின் டன்கேன் பிளட்சர், நியூசிலாந்தின் ஜான் ரைட் ஆகியோரும் இடம் பெற்றுள்ளனர்.