பிரமோத் மகாஜன் மகள் மகாராஷ்டிர தேர்தலில் போட்டி
மகாராஷ்டிர சட்டசபைத் தேர்தலில் போட்டியிடும் 66 பாஜக வேட்பாளர்களின் முதல் பட்டியல் வெளியாகியுள்ளது. அதில் பிரமோத் மகாஜனின் மகள் பூனம் மகாஜனின் பெயரும் இடம் பெற்றுள்ளது. மும்பையில் உள்ள மேற்கு கட்கோபர் தொகுதியில் பூனம் போட்டியிடுகிறார்.
66 பேரில் 23 பேர் ஏற்கனவே எம்.எல்.ஏக்களாக இருப்பவர்கள். தற்போதைய எம்.எல்.ஏக்கள் 9 பேருக்கு சீட் மறுக்கப்பட்டுள்ளது.
முதல் பட்டியலில் 2 பேர் பெண்கள் ஆவர். 6 பேர் எஸ்.சி. வேட்பாளர்கள், 9 பேர் எஸ்.டி. வேட்பாளர்கள்.
இப்பட்டியலில் இடம் பெற்றுள்ள ஒரே முஸ்லீம் வேட்பாளர் ஜலீல் அன்சாரி. இவர் மாலேகான் (மத்தி) தொகுதியில் நிறுத்தப்பட்டுள்ளார்.
மாலேகான் குண்டுவெடிப்பு வழக்கும், அதில் இந்து தீவிரவாதம் சம்பந்தப்பட்டிருப்பதும், இந்து அமைப்பின் தலைவர்கள் பலர் கைது செய்யப்பட்டிருப்பதும் நினைவிருக்கலாம். இந்த நிலையில் அத்தொகுதியில் முஸ்லீம் வேட்பாளரை நிறுத்தியுள்ளது பாஜக.