2010க்குள் 60 லட்சம் இணைப்புகள்: சன் டிடிஎச் இலக்கு

சென்னை: அடுத்த ஆண்டு மார்ச் மாதத்தில் சன் டிடிஎச் இணைப்புகள் 60 லட்சத்தை தொடும் என சன் குழுமம் தெரிவித்துள்ளது.

மாறன் குடும்பத்தினர் 80 சதவீதமும் மலேசியாவின் ஆஸ்ட்ரோ குழுமத்தினர் 20 சதவீத பங்குகளும் கொண்டுள்ள நிறுவனம் சன் டைரக்ட். இந்த நிறுவனத்தில் இப்போது 43 லட்சம் பேர் டிடிஎச் இணைப்புகள் பெற்றுள்ளனர்.

இந்த எண்ணிக்கையை மேலும் அதிகரிக்க புதிய திட்டங்களை சன் டைரக்ட் அறிமுகப்படுத்த உள்ளது.

இதுகுறித்து சன் டைரக்ட் தலைமை நிர்வாக அலுவலர் டோனி டி சில்வா கூறுகையில்,

சன் டிடிஎச் இணைப்புகள் பெறுவோர் எண்ணிக்கை அடுத்த ஆண்டு மார்ச் மாதம் 60 லட்சமாக உயரும் என நம்புகிறோம். வரவிருக்கும் விழா காலத்தை அதற்கு சாதகமாகப் பயன்படுத்திக் கொள்வோம். நிலைமை சாதகமாக இருந்து வருகிறது.

இன்றைய நிலையில், எங்கள் நிறுவனத்தின் 80 சதவீத இணைப்புகள் தென் இந்தியாவில்தான் உள்ளன. இனி எங்களது கவனத்தை வட மாநிலப் பகுதிகளிலும் செலுத்த இருக்கிறோம். இதற்காக மார்க்கெட் துறைக்கு ரூ. 150 கோடி செலவிட தீர்மானித்துள்ளோம். வரும் டிசம்பர் முதல் இதில் முழு கவனம் செலுத்துவோம், என்றார்.

ஒவ்வொரு சன் டைரக்ட் இணைப்பு மூலமும் அந் நிறுவனத்துக்கு மாதம் ரூ. 100 வருவாயாகக் கிடைப்பது குறிப்பிடத்தக்கது.