தலிபான் தலைவர் ஹக்கிமூல்லாவின் ஊரைப் பிடித்தது பாக். ராணுவம்
இஸ்லாமாபாத்: பாகிஸ்தான் ராணுவத்திற்கு முக்கிய வெற்றி கிடைத்துள்ளது. தெற்கு வசிரிஸ்தான் பிராந்தியத்தி்ல் அது தொடங்கியுள்ள ராணுவ நடவடிக்கையின் முக்கிய வெற்றியாக, தலிபான் தலைவர் ஹக்கிமூல்லாவின் சொந்த ஊரான கொக்காய் நகரம் ராணுவத்தின் வசம் வந்துள்ளது.
கடந்த எட்டு நாள் தாக்குதலின் விளைவாக கொக்காய் நகரைப் பிடித்துள்ளது பாகிஸ்தான் படை. தரை மற்றும் வான் வழித் தாக்குதலின் மூலம் தலிபான்களின் முக்கிய நகரான கொக்காயைப் பிடித்துள்ளது பாகிஸ்தான்.
கொக்காய் நகருக்கு அருகில்தான் தலிபான்களின் மிக முக்கிய நகரான சரரோகா உள்ளது. எனவே கொக்காய் நகரைப் பிடித்துள்ளது பாகிஸ்தான் ராணுவத்திற்குப் பெரிய வெற்றி என்று கருதப்படுகிறது. கொக்காய் நகரில் உள்ள பல வீடுகளை தலிபான்கள் பங்கர்கள் போல மாற்றி வைத்துள்ளனர். அங்கு தற்கொலைப் படையினருக்கான பயிற்சி முகாம் ஒன்றும் இயங்கி வந்தது.
தற்போது தலிபான்கள் சிதறி ஓடிக் கொண்டிருப்பதாகவும், பலர் தலிபான் அமைப்பை விட்டே விலகிப் போய்க் கொண்டிருப்பதாகவும், ராணுவ செய்தித் தொடர்பாளர் ஒருவர் தெரிவித்துள்ளார்.
மறுபக்கம் ஆப்கானிஸ்தானில் இருந்தபடி தொடர்ந்து அமெரிக்கா தனது ஏவுகணைத் தாக்குதலை நடத்தி வருகிறது. நேற்று நடந்த தாக்குதலில் 22 பேர் கொல்லப்பட்டனர்.