இன்னும் மந்தத்தில் தவிக்கிறது அமெரிக்க பொருளாதாரம்! - வாரன் பஃபே
தேசிய பொருளாதார ஆராய்ச்சிக் குழு கடந்த திங்களன்று வெளியிட்ட அறிவிப்பில், அமெரிக்கப் பொருளாதாரத்தில் 18 மாதங்கள் நிலவிய பெரும் மந்தம் கடந்த ஜூன் 2009-ல் முடிவுக்கு வந்தது. ஆனால் சகஜ நிலை திரும்பிவிட்டதாக இதற்கு அர்த்தம் கொள்ளக் கூடாது, என்று கூறியிருந்தது.
ஆனால் பஃபே இதனை வேறு கோணத்தில் பார்க்க வேண்டும் என்கிறார். அமெரிக்காவின் தனிமனித வருவாய் மற்றும் மொத்த வருவாயில் இன்னமும் எதிர்மறை போக்கே நிலவுவதால் பொருளாதார மந்தம் தொடர்வதாகவே அர்த்தம் கொள்ள வேண்டும் என்றார். வாரன் பஃபேயின் பெர்க்ஷையர் ஹதாவே 80 தொழில்களில் முதலீடு செய்துள்ளது. இவற்றில் பெரும்பாலானவை இப்போதுதான் மெல்ல மெல்ல மீட்சிக்கு திரும்புகின்றனவாம்.
சில தினங்களுக்கு முன் அமெரிக்க அதிபர் பாரக் ஒபாமா பேசுகையில், அமெரிக்கப் பொருளாதாரம் இன்னும் மோசமான கட்டத்தைத் தாண்டவில்லை என்றும், பொருளாதார மந்தம் என்பதை சாதார அமெரிக்கக் குடிமகனாலும் உணரமுடிகிறது என்றும் கூறியது நினைவிருக்கலாம்.
இதற்கிடையே, பொருளாதார மீட்சியை வேகப்படுத்த மேலும் சில ஊக்கச் சலுகைகளை அளிக்க அமெரிக்க நிதித் துறை தயாராகி வருகிறது.