நானோ,செல்போன், ஜெனரேட்டர் இலவசம்: அசத்தும் சேலம் சுயேட்சை வேட்பாளர்
சென்னை: எனக்கு வாக்களித்து ஜெயிக்க வைத்தால் ஆளுக்கொரு நானோ கார் தருகிறேன் என்று மக்களை ஒரேயடியாக ஈர்த்துள்ளார் சேலம் தெற்கு மற்றும் வடக்கு தொகுதிகளில் சுயேட்சையாக நிற்கும் ஷாஜகான்.
தமிழகத்தில் வரும் 13-ம் தேதி சட்டசபை தேர்தல் நடக்கிறது. அரசியல் கட்சிகள் அவரவர் சக்திக்கேற்றவாறு அதைத் இலவசமாகத் தருகிறோம், இதைத் தருகிறோம் என்று வாக்காளர்களுக்கு தாராளமாய் வாக்குறுதிகளை அளித்து வருகின்றனர். இந்த கூட்டத்தில் தற்போது சுயேட்சை வேட்பாளர் ஷாஜகானும் சேர்ந்துள்ளார்.
அவர் அளித்துள்ள வாக்குறுதி தான் இதுவரை அறிவிக்கப்பட்டதிலேயே டாப். ஏனென்றால் அவருக்கு வாக்களித்து வெற்றி பெறச் செய்தால் ஆளுக்கொரு நானோ தருவதாகக் கூறியுள்ளார். இதுமட்டுமல்ல ஆளுக்கொரு செல்போன், மின்வெட்டு நேரங்களில் சுகமாக இருக்க ஜெனரேட்டர், இலவச கேபிள் டிவி இணைப்பு மற்றும் மாணவர்களுக்கு ரூ. 200 பாக்கெட் மணி.
இத்தனையும் கொடுக்க உங்களுக்கு எங்கிருந்து பணம் வரும் என்று கேட்டதற்கு, 2ஜி ஊழல் பணத்தைப் பிடித்தாலே போதும், இன்னும் என்னென்னவோ கொடுக்கலாம் என்று தெரிவித்தார்.