வெள்ளி விலை திடீர் சரிவு: ஒரே வாரத்தில் கிலோவுக்கு ரூ.17 ஆயிரம் குறைந்தது!!
ஜனவரி (2011) மாதம் 1-ந் தேதி ஒரு கிலோ வெள்ளியின் விலை ரூ.49,300 ஆக இருந்தது. அது பிப்ரவரி 1-ந் தேதி ரூ.46,000 ஆக குறைந்தது. பின்னர் மார்ச் 1-ந் தேதி ரூ.55,200 ஆகவும், ஏப்ரல் 1-ந் தேதி ரூ.60,200 ஆகவும் உயர்ந்தது. கடந்த ஏப்ரல் 30-ந் தேதி அதிக பட்சமாக ஒரு கிலோ வெள்ளியின் விலை ரூ.76,600 ஆக இருந்தது.
இந்த திடீர் விலை உயர்வால் வெள்ளி மற்றும் அதைச் சார்ந்துள்ள தொழிலில் ஈடுபட்டிருந்தவர்கள் மிகவும் பாதிக்கப்பட்டனர்.
ஆன்-லைன் வர்த்தகத்தால்தான் இந்த விலை உயர்வு ஏற்பட்டு வருகிறது. இதனால் ஆன்-லைன் வர்த்தகத்தை தடைசெய்ய உடனடியாக அரசு நடவடிக்கை எடுக்கவேண்டும் என்று அவர்கள் வலியுறுத்தி வந்தனர்.
இந்நிலையில் கடந்த ஒரு வாரமாக வெள்ளியின் விலை வீழ்ச்சி அடைந்து வருகிறது. கடந்த ஏப்ரல் 30-ந் தேதி ரூ.76,000 ஆக இருந்த ஒரு கிலோ வெள்ளியின் விலை, மே 2-ந் தேதி ரூ.72,150 ஆக குறைந்தது. மே 4-ந் தேதி வெள்ளியின் விலை திடீரென வீழ்ச்சி அடைந்து ரூ.67,500-க்கு விற்பனையானது.
நேற்று (5-ந் தேதி) வெள்ளியின் விலை மேலும் குறைந்து, கிலோ ரூ.63,350-க்கு விற்பனையானது.
சேலத்தில் ஒரு கிலோ பார் வெள்ளி நேற்று ரூ.58,000-த்திற்கு விற்பனையானது. இங்குதான் வெள்ளி நகைத் தொழில் அதிகம் நடைபெறுவது குறிப்பிடத்தக்கது. இதன் மூலம் கடந்த ஒரு வாரத்துக்குள் வெள்ளியின் விலை கிலோவுக்கு ரூ.17,000 வரை குறைந்துள்ளது குறிப்பிடத்தக்கது.