9 ஆண்டுகள்தான், ஆனால் திமுக செய்த சாதனைகளைப் பாரீர்.. பெருமிதப்படும் திருச்சி சிவா!
சென்னை: மத்திய அரசுடன், கடந்த 9 ஆண்டு காலமாக கூட்டணியில் இருந்த திமுக தமிழகத்திற்கு எத்தனையோ திட்டங்களைக் கொண்டு வந்துள்ளது. எத்தனையோ சாதனைகளைப் படைத்துள்ளது என்று அக்கட்சியின் ராஜ்யசபா எம்.பி. திருச்சி சிவா கூறியுள்ளார்.
கடந்த 9 வருடமாக காங்கிரஸ் தலைமையிலான ஐக்கிய முற்போக்குக் கூட்டணியில் இருந்து வந்த திமுக தற்போது அதிலிருந்து விலகி விட்டது. இந்த காலகட்டத்தில் அது பல்வேறு முக்கிய அமைச்சர் பொறுப்புகளை அது வகித்துள்ளது.
இந்த உறவு தற்போது முறிந்துள்ளது - தற்காலிகமாகத்தான் என்று விஷயம் தெரிந்தவர்கள் கிசுகிசுப்பது தனிக் கதை - இந்த நிலையில், திமுக தமிழகத்திற்கு என்னென்ன செய்தது என்பதை திருச்சி சிவா பட்டியலிட்டுள்ளார்.
செம்மொழி தமிழ்
தமிழ்மொழிக்கு செம்மொழி அந்தஸ்து, சேது சமுத்திர திட்டம் என பல்வேறு நல்ல திட்டங்களை தமிழகத்துக்கு பெற்று வந்த பெருமை தி.மு.க.வுக்கு உண்டு. இதில் சேது சமுத்திரத திட்டத்துக்கு பல்வேறு முட்டுக்கட்டை ஏற்பட்டதால் பணிகள் பாதியில் நிற்கிறது.
தங்க நாற்கர சாலைகள்
தமிழ்நாட்டில் உள்ள தேசிய நெடுஞ்சாலைகளை அகலப்படுத்தி 4 வழி சாலையாக மாற்றியது. தங்க நாற்கர சாலையை விரைவு படுத்தி முடித்தது. மதுரவாயல்-துறைமுகம் இடையே ரூ.1655 கோடியில் பறக்கும் சாலை திட்டம், சென்னை கத்திப்பாரா மேம்பாலம், கோயம்பேடு மேம்பாலம், பாடி மேம்பாலம், மீனம்பாக்கம் விமான நிலைய மேம்பாலம் என சாலை அபிவிருத்தியில் தமிழ்நாட்டிற்கு முன்னுரிமை கொடுத்து செயல்படுத்தியது.
கடல் நீரைக் குடிநீராக்கும் திட்டம்
சென்னை விமான நிலைய விரிவாக்கம், நெம்மேலி கடல்நீரை குடிநீராக்கும் திட்டம், கிழக்கு கடற்கரை சாலையில் கடல் சார் பல்கலைக் கழகம், தாம்பரம் தேசிய சித்த மருத்து வமனை உள்பட பல்வேறு திட்டங்களை எடுத்துக் காட்டாக கூறலாம்.
தேசிய ஊரக வேலைவாய்ப்புத் திட்டம்
மத்திய அரசின் தேசிய ஊரக வேலை வாய்ப்பு திட்டத்தை இந்தியாவிலேயே தமிழ்நாட்டில்தான் சிறந்த முறையில் செயல்படுத்தியது என்ற பெருமை திமுகவுக்கு உண்டு. சுப்ரீம் கோர்ட்டே இதை பாராட்டியது.
சென்னைக்கு மெட்ரோ ரயில்
சென்னை மெட்ரோ ரயில் திட்டம், ஓரகடத்தில் வாகனங்களுக்கான தேசிய ஆராய்ச்சி மையம் மற்றும் பல்வேறு தொழிற்சாலைகள் கொண்டு வந்தது.
செல்போன் கட்டணத்தைக் குறைத்தோம்
இன்று பாமரர் கையிலும் செல்போன் இருக்கும் வகையில் கட்டணத்தை குறைத்து இந்தியா முழுவதும் குறைந்த கட்டணத்தில் பேச வழிவகை செய்தது தி.மு.க.வின் சாதனையாகும். இந்த பட்டியலை அடுக்கி கொண்டே போகலாம் என்றார் சிவா.