லேண்டிங் கியரில் கோளாறு: நியூயார்க்கில் விமான விபத்து- 10 பேர் காயம்
சவுஸ்வெஸ்ட் ஏர்லைன்ஸுக்கு சொந்தமான போயிங் 737-700 ரக விமானம் ஒன்று நேற்று நாஷிவில்லில் இருந்து 150 பயணிகளுடன் கிளம்பி நியூயார்க்கில் உள்ள கார்டியா விமான நிலையத்தில் தரையிறங்க முயன்றது. அப்போது அதன் முன்பக்க லேண்டிங் கியரில் கோளாறு ஏற்பட்டதால் விமானம் ஓடுதளத்தில் இருந்து திசை மாறிச் சென்று முன் பகுதி முட்டி நின்றது.
இந்த விபத்தில் விமானத்தில் இருந்தவர்களில் 10 பேர் காயம் அடைந்தனர். விமானம் நின்றவுடன் பயணிகள் அனைவரும் அவசரமாக வெளியேற்றப்பட்டனர்.
இந்த விபத்தை அடுத்து கார்டியா விமான நிலையத்திற்கு வந்த விமானங்கள் வேறு விமான நிலையங்களுக்கு திருப்பிவிடப்பட்டன. மேலும் கார்டியா விமான நிலையத்தில் இருந்து விமானங்கள் 2 மணிநேரம் தாமதமாக கிளம்பிச் சென்றன.
இந்த மாத துவக்கத்தில் ஏசியானா ஏர்லைன்ஸின் போயிங் 777 விமானம் சான் பிரான்சிஸ்கோவில் தரையிறங்குகையில் ஏற்பட்ட விபத்தில் 3 பேர் பலியாகினர் மற்றும் 180 பேர் காயம் அடைந்தனர் என்பது குறிப்பிடத்தக்கது.