தலைவா படத்தை ரிலீஸ் செய்ய நான் தயார்- திமுக எம்எல்ஏ ஜெ. அன்பழகன் அதிரடி அறிவிப்பு
சென்னை: எனது அன்பு பிக்சர்ஸ் மூலமாக தலைவா படத்தை நான் தைரியமாக வெளியிடத் தயார். சரி என்று தலைவா பட குழுவினர் சொன்னால் உடனடியாக படத்தை நான் 300 தியேட்டர்களில் வெளியிடுவேன் என்று கூறியுள்ளார் திமுக எம்.எல்.ஏவும், தென் சென்னை திமுக மாவட்டச் செயலாளருமான ஜெ.அன்பழகன்.
தலைவா படத்திற்கு யார் தரப்பிலிருந்து சிக்கல் வருகிறது என்பதே பெரும் மர்மமாக உள்ள நிலையி்ல படத்தை திரையிடும் வழி தெரியாமல் படக்குழுவினர் விழி பிதுங்கி நிற்கின்றனர்.
இந்தநிலையில் திமுக தரப்பிலிருந்து படத்தை நாங்கள் தைரியமாக வெளியிட தயார் என்ற குரல் வந்திருப்பதால் பரபரப்பு ஏற்பட்டுள்ளது.
அன்பு பிக்சர்ஸ்
திமுக எம்.எல்.ஏ ஜெ. அன்பழகன்தான் இந்த ஆதரவுக் குரலைக் கொடுத்திருக்கிறார். இவர் அன்பு பிக்சர்ஸ் என்ற பட நிறுவனத்தை வைத்திருக்கிறார்.
தலைவா படத்துக்கு ஆதரவு
அமீர் நடித்த ஆதி பகவன் படத்தை இவர்தான் தயாரித்துள்ளார்.
தற்போது தலைவா படத்தை தானே வெளியிடத் தயாராக இருப்பதாக அன்பழகன் அறிவித்துள்ளார்.
டிவிட்டரில் தகவல்
இதுகுறித்து அன்பழகன் வெளியிட்டுள்ள டிவிட்டர் தகவலில், எங்களது கட்டுப்பாட்டில் தமிழம், புதுச்சேரியில் 300 தியேட்டர்கள் உள்ளன. அதில் தலைவா படத்தை ரிலீஸ் செய்யத் தயார்.
தைரியமாக வெளியிடுகிறேன்
நானே தைரியமாக இந்தப் படத்தை வெளியிடுகிறேன். தலைவா படக் குழுவினர் இதற்குத் தயாராக இருந்தால் அன்பு பிக்சர்ஸ் தலைவா படத்தை வெளியிடும். எந்தத் தடையுமில்லாமல் படத்தைத் திரைக்குக் கொண்டு வர நான் உத்தரவாதம் தருகிறேன் என்று கூறியுள்ளார் ஜெ அன்பழகன்.
தயாரிப்பாளரின் வலி தெரியும்
மேலும் அவர் கூறுகையில், ஒரு தயாரிப்பாளரின்வலி என்ன என்பது எனக்குத் தெரியும். படத்தை எப்படித் திரையிடுவது என்றும் எனக்குத் தெரியும். இந்த சவாலை எனது சொந்த ரிஸ்க்கில் வெளியிடவும் நான் தயாராக இருக்கிறேன் என்றும் கூறியுள்ளார் அன்பழகன்.