பெட்ரோல் லிட். ரூ. 2.41, டீசல் லிட். ரூ. 2.25 விலை குறைப்பு: நள்ளிரவு முதல் அமல்

டெல்லி: பெட்ரோல் விலை லிட்டருக்கு 2 ரூபாய் 41 காசும், டீசல் விலை லிட்டருக்கு 2 ரூபாய் 25 காசும் குறைக்கப்பட்டுள்ளது. வெள்ளிக்கிழமை நள்ளிரவு முதல் இது அமலுக்கு வந்துள்ளது.

சென்னையில் பெட்ரோல் விலை லிட்டருக்கு 2 ரூபாய் 58 காசு குறைந்து 67 ரூபாய் ஒரு காசாக நிர்ணயிக்கப்பட்டுள்ளது. இதற்கு முன் பெட்ரோல் விலை கடந்த 15ம் தேதி லிட்டருக்கு ஒரு ரூபாய் 21 காசு குறைக்கப்பட்டது.

டீசல் விலையை மத்திய அரசு கடந்த 18ம் தேதி லிட்டருக்கு 3 ரூபாய் 37 காசு குறைத்தது. அதோடு, பெட்ரோலைப் போல டீசல் விலையையும் எண்ணெய் நிறுவனங்களே சர்வதேச சந்தை நிலவரப்படி நிர்ணயித்துக் கொள்ளும் அதிகாரத்தை அளித்தது.

டீசல் விலை நிர்ணய அதிகாரம் எண்ணெய் நிறுவனங்களிடம் வந்த பிறகு முதல்முறையாக டீசல் விலை லிட்டருக்கு 2 ரூபாய் 25 காசு குறைக்கப்பட்டுள்ளது.

6-வது முறையாக குறைப்பு

இந்த ஆண்டு ஆகஸ்டு மாதத்தில் இருந்து பெட்ரோல் விலை 6-வது முறையாக குறைக்கப்பட்டுள்ளது குறிப்பிடத்தக்கது.

15 நாட்களில்

தற்போது சர்வதேச சந்தையில் கச்சா எண்ணெய் விலை தொடர்ந்து வீழ்ச்சி கண்டு வருவதால் பெட்ரோலைத் தொடர்ந்து டீசல் விலையும் குறைக்கப்பட்டிருக்கிறது.

கடந்த 15 நாட்களில் டீசல் விலை மட்டும் 5 ரூபாய் 62 காசு குறைந்துள்ளது. கடந்த 15ம் தேதிக்கு முன்பு வரை டீசல் விலை மாதந்தோறும் லிட்டருக்கு 50 காசுகள் உயர்த்தப்பட்டு வந்தது.

வித்தியாசம் எவ்வளவு

விலைக் குறைக்கப்பட்ட பிறகு சென்னையில் பெட்ரோல் விலை ஒரு லிட்டர் 69 ரூபாய் 59 காசில் இருந்து 2 ரூபாய் 58 காசு குறைந்து 67 ரூபாய் ஒரு காசாக உள்ளது.

டெல்லி, மும்பையில்

டெல்லியில் 64 ரூபாய் 24 காசாகவும், கொல்கத்தாவில் 71 ரூபாய் 68 காசாகவும் இருக்கிறது. மும்பையில் பெட்ரோல் விலை 71 ரூபாய் 91 காசாக குறைந்துள்ள நிலையில், சென்னையில் டீசல் விலை ஒரு லிட்டர் 59 ரூபாய் 27 காசில் இருந்து 2 ரூபாய் 43 காசு குறைந்து 56 ரூபாய் 84 காசுக்கு விற்பனை செய்யப்படுகிறது.

English summary

Petrol price was on Friday cut by Rs. 2.41 a litre, the sixth reduction since August, while that of diesel was slashed by Rs. 2.25 per litre on the back of falling international oil rates.