பெட்ரோல் விலை லிட்டருக்கு ரூ.2.42, டீசல் விலை லிட்டருக்கு ரூ.2.25 குறைப்பு!
டெல்லி: பெட்ரோல் விலை ரூ.2.42-ம் டீசல் விலை ரூ.2.25-ம் குறைக்கப் பட்டுள்ளது. இதன்படி சென்னையில் பெட்ரோல் விலை ரூ. 58.96-க்கு விற்பனை செய்யப்படுகிறது.
சர்வதேச சந்தை நிலவரத்துக்கு ஏற்ப பொதுத் துறை எண்ணெய் நிறுவனங்கள் பெட்ரோல், டீசல் விலையை நிர்ணயம் செய்து வருகின்றன. அதன்படி ஒவ்வொரு மாதமும் 1-ம் தேதி மற்றும் 16-ம் தேதிகளில் பெட்ரோல், டீசல் விலை மாற்றம் செய்யப்பட்டு வருகிறது.
கடந்த சில மாதங்களாக சர்வதேச சந்தையில் கச்சா எண்ணெய் விலை கணிசமாக சரிந்து வருகிறது. அதன் தொடர்ச்சியாக பெட்ரோல் விலை லிட்டருக்கு ரூ.2.42 குறைந்தது. டீசல் விலை லிட்டருக்கு ரூ.2.25 குறைந்தது. அந்தந்த மாநிலங்களின் உள்ளூர் வரிவிதிப்புக்கு ஏற்ப விலை மாறுபடும்.
இதன்படி சென்னையில் இதுவரை ரூ.61.38-க்கு விற்கப்பட்ட ஒரு லிட்டர் பெட்ரோல், இனி 2 ரூபாய் 42 காசுகள் குறைந்து ரூ. 58.96-க்கு விற்பனையாகும்.
இதேபோல், ரூ.51.34-க்கு விற்கப்பட்ட ஒரு லிட்டர் டீசல், இனி 2 ரூபாய் 25 காசுகள் குறைந்து இனி ரூ.49.09-க்கு விற்பனையாகும் என பெட்ரோலிய நிறுவனங்கள் அறிவித்துள்ளன.
இன்று நள்ளிரவு முதல் இந்த புதிய விலை அமலுக்கு வரும்.