முதல்வர் மு.க.ஸ்டாலின் அறிவிப்பின்படி... தமிழகத்தில் இன்று முதல் ஆவின் பால் விலை குறைப்பு
சென்னை: தமிழக முதல்வர் மு.க.ஸ்டாலின் அறிவிப்பின்படி இன்று முதல் ஆவின் பால் விலை குறைப்பு அமலுக்கு வந்தது.
தமிழக முதல்வராக மு.க.ஸ்டாலின் பொறுப்பேற்ற கடந்த 7-ந் தேதி 5 முக்கியமான அறிவிப்புகளில் கையெழுத்திட்டார். அதில் ஆவின் பால் விலை குறைப்பும் வெளியிடப்பட்டு இருந்தது. மேலும் ஆவின் பால் விலை குறைப்பானது இன்று முதல் (மே 16) நடைமுறைக்கு வரும் என்றும் முதல்வர் மு.க.ஸ்டாலின் அறிவித்தார்.
இதன்படி ஆவின் பால் விலை குறைப்பு இன்று முதல் நடைமுறைக்கு வந்துள்ளது. தமிழக தற்போது ஆவின் நீல நிறம் லிட்டருக்கு ரூ.40, அரை லிட்டர் ரூ.20-க்கும் விற்பனை செய்யப்படுகிறது.
ஆவின் பால் விலை குறைப்பு.. புதிய விலை பட்டியல் வெளியீடு.. முழு விவரம்
ஆவின் பச்சை நிறம் அரை லிட்டர் ரூ.22-க்கும், ஆவின் ஆரஞ்சு அரை லிட்டர் ரூ.24-க்கும் விற்பனை செய்யப்படுகிறது. அதேபோல் ஆவின் இளஞ்சிவப்பு நிறம் அரை லிட்டர் ரூ.18.50-க்கு விற்பனை செய்யப்படுகிறது. டீமேட் எனப்படும் பால் லிட்டருக்கு ரூ.57-க்கு விற்பனையாகிறது.
ஆவின் பால் அட்டை வைத்திருப்போருக்கு லிட்டருக்கு ரூ.3 குறைக்கப்பட்டுள்ளது. அதாவது ஆவின் நீல நிற பால் பாக்கெட் லிட்டர் ரூ.37, அரை லிட்டர் ரூ.18.50, பச்சை நிற அரை லிட்டர் ரூ.21, ஆரஞ்சு நிறம் ரூ.23, இளஞ்சிவப்பு ரூ.18-க்கு விற்பனை செய்யப்படுகிறது. இந்த விலை குறைப்பு காரணமாக ஆண்டுக்கு ரூ.300 கோடி வரை இழப்பு ஏற்படும் என்று தெரிவிக்கப்பட்டுள்ளது.