“நீங்க அனுப்புன பணம்..” - நடிகர் தனுஷுக்கு கண்ணீர் மல்க நன்றி சொன்ன போண்டா மணி!

சென்னை : சிறுநீரக பாதிப்பால் மருத்துவமனையில் சிகிச்சை பெற்று வரும் நடிகர் போண்டா மணிக்கு நடிகர் தனுஷ் ரூ.1 லட்சம் கொடுத்து உதவி செய்துள்ளார்.

நடிகர் தனுஷ் செய்த இந்த உதவிக்கு நன்றி கூறி போண்டா மணி வீடியோ ஒன்றை வெளியிட்டுள்ளார். இந்த வீடியோ சமூக வலைதளங்களில் தீயாகப் பரவி வருகிறது.

நடிகர் போண்டா மணி இரண்டு சிறுநீரகங்களும் செயலிழந்து மருத்துவமனையில் அனுமதிக்கப்பட்டுள்ளார். ஓமந்தூரார் மருத்துவமனையில் அவருக்கு தீவிர சிகிச்சை அளிக்கப்பட்டு வருகிறது.

போண்டாமணிக்கு உடல் நிலை சரி இல்லை என்பதால் மருத்துவ உதவிக்கு பணம் கொடுத்து உதவ வேண்டும் என அவரது நண்பரும் நடிகருமான பெஞ்சமின் வீடியோ வெளியிட்டு இருந்தார். அவரது கோரிக்கையை ஏற்று பல திரையுலக நட்சத்திரங்கள் உதவி வருகின்றனர்.

தீவிர சிகிச்சையில் போண்டாமணி

நகைச்சுவை நடிகர் போண்டாமணி அவசர சிகிச்சைப்பிரிவில் அனுமதிக்கப்பட்டுள்ளதாகவும், அவரது மேல் சிகிச்சைக்கு உதவும்படியும் கோரி நடிகர் பெஞ்சமின் ஒரு வீடியோவை வெளியிட்டிருந்தார். அதில், "அன்பு அண்ணன், நகைச்சுவை நடிகர் போண்டாமணிக்கு இரண்டு கிட்னிகளும் செயலிழந்து விட்டன. அவர் சென்னை ஓமந்தூரார் மருத்துவமனையில் அவசர சிகிச்சைப்பிரிவில் அனுமதிக்கப்பட்டுள்ளார். இந்த காணொலியைப் பார்க்கும் நண்பர்கள் மேல் சிகிச்சைக்கு உதவும்படி பணிவுடன் கேட்டுக்கொள்கிறேன்" எனத் தெரிவித்திருந்தார்.

உருக்கமான வீடியோ

மேலும், இலங்கையிலிருந்து வந்து தமிழகத்தில் தஞ்சம் புகுந்து பல்வேறு தடைகளைத் தாண்டி சினிமாவில் நுழைந்தவர் போண்டா மணி. தனியாகவே இந்தியாவுக்கு வந்தார், அவர் தனியாக குழந்தைகளை விட்டுவிட்டு போய்விடக்கூடாது. நம்மால் முடிந்தவரை அவருக்கு உதவ வேண்டும" என்று கண்ணீர்மல்க பேசியிருந்தார் பெஞ்சமின். இந்த வீடியோ தீயாகப் பரவியதை அடுத்து நடிகர் போண்டா மணிக்கு பலரும் உதவிக்கரம் நீட்டி வருகின்றனர்.

குவியும் உதவிகள்

இதையடுத்து நடிகர் போண்டாமணியை நேரில் சென்று சந்தித்து நலம் விசாரித்த சுகாதாரத்துறை அமைச்சர் மா.சுப்பிரமணியன், போண்டா மணியின் மருத்துவச் செலவு அனைத்தையும் அரசே ஏற்கும் என தெரிவித்திருந்தார். அதேபோல் கடந்த சில நாட்களுக்கு முன்னர் நடிகர் விஜய் சேதுபதி ரூ.1 லட்சம் கொடுத்து உதவி இருந்தார். அந்த ஒரு லட்சம் ஒரு கோடிக்கு சமம் என நெகிழ்ச்சியுடன் பேசியிருந்தார் போண்டா மணி. மேலும் வடிவேலு தன்னிடம் பேசியதில் தான் பாதி குணமடைந்துவிட்டதாகவும் கூறினார். வடிவேலு தன்னால் இயன்ற உதவியைச் செய்வேன் என்றும் உறுதியளித்தார்.

தனுஷ் உதவி கண்ணீர் மல்க நன்றி

இந்நிலையில் நடிகர் தனுஷ், நடிகர் போண்டா மணியின் மருத்துவ செலவுக்காக ரூ.1 லட்சம் நிதி உதவி வழங்கி உள்ளார். தனுஷ் அனுப்பிய பணம் தனக்கு மிகவும் உதவியாக இருப்பதாக கூறி அவருக்கு கண்ணீர் மல்க நன்றி தெரிவித்துள்ளார் போண்டா மணி. ரசிகர்கள் தனுஷின் இந்தச் செயலை பாராட்டி வருகின்றனர்.

English summary

Dhanush financially helped (1 lakh) to comedy actor Bonda Mani who is under treatment at Chennai Government Hospital. Bonda mani thanked Dhanush for this help.