ஹைடெக் முறையில் திமுக இளைஞரணியில் உறுப்பினர் சேர்க்கை...!
Recommended Video
சென்னை: திமுக இளைஞரணி சார்பாக தமிழகம் முழுவதும் உறுப்பினர் சேர்க்கை முகாம்கள் இன்று காலை தொடங்கின.
திமுக இளைஞரணி செயலாளராக உதயநிதி ஸ்டாலின் பொறுப்பேற்ற பின்னர், அந்த அணியின் மூலம் திமுகவை பலப்படுத்தும் நடவடிக்கைகளில் ஈடுபட்டு வருகிறார். குளம் குட்டைகளில் தூர்வாரும் பணிகள் மேற்கொண்டு வருவதுடன், ரத்ததானம் உள்ளிட்ட சமுக நலப்பணிகளிலும் அக்கறை காட்டத் தொடங்கியுள்ளார்.
இரண்டு மாத காலத்திற்குள் புதிதாக 30 லட்சம் இளைஞர்களை திமுக இளைஞரணியில் சேர்க்க இலக்கு நிர்ணயம் செய்துள்ள உதயநிதி ஸ்டாலின், அதற்கான நடவடிக்கைகளில் முழு வீச்சில் இறங்கியிருக்கிறார். மேலும், ஏற்கனவே தனது ரசிகர் மன்றத்தில் உள்ள நிர்வாகிகளையும், உறுப்பினர்களையும் அப்படியே இளைஞரணிக்குள் கொண்டு வருகிறார். இதனால் மாவட்டச் செயலாளர்கள் சற்று கலக்கம் அடைந்துள்ளனர்.
சென்னை ஆயிரம் விளக்கு பகுதியில் நடைபெற்ற முகாமிற்கு தானே நேரடியாக சென்றதோடு மட்டுமல்லாமல், அங்கு அமர்ந்து புதிய உறுப்பினர்களை இணைக்கும் பணியில் ஈடுபட்டார். படிவங்கள் மூலம் புதிய உறுப்பினர்களை இணைக்கும் பணி ஒரு புறம் நடக்க, இணையதளம் மூலமும் புதிய உறுப்பினர்களை சேர்க்கும் பணிகள் தொடங்கியுள்ளது. இதற்காக பிரத்யேகமாக வடிவமைக்கப்பட்டுள்ள திமுக இளைஞரணி இணையதள பக்கத்திற்கு சென்றால், எளிமையான முறையில் உறுப்பினராக முடியும்.
இன்றைய இளைஞர்கள் நேரடியாக முகாமிற்கு சென்று படிவத்தை பூர்த்தி செய்துதர தயக்கம் காட்டுவதை அறிந்து, உணர்ந்து புதிய உறுப்பினர்கள் சேர்ப்பில் தொழில்நுட்பத்தையும் புகுத்தியுள்ளார் உதயநிதி.