ரஜினி கட்சியெல்லாம் ஆரம்பிக்க வேண்டாம்.. பாஜகவில் சேர்ந்துடலாம்.. கார்த்தி சிதம்பரம் அதிரடி அட்டாக்!

சென்னை: காங்கிரஸ் எம்பி கார்த்தி சிதம்பரம் நேரடியாக நடிகர் ரஜினிகாந்த்தை கடுமையாக விமர்சித்துள்ளார்.

நடிகர் ரஜினிகாந்த் புதுக் கட்சி தொடங்கப் போவதாக இனியும் கூறிக் கொண்டிருக்க வேண்டாம். மாறாக பாஜகவிலேயே அவர் போய்ச் சேர்ந்து விடலாம் என்று நேரடியாகவே அட்டாக் செய்துள்ளார் கார்த்தி சிதம்பரம்.

நடிகர் ரஜினிகாந்த் எது பேசினாலும் அது கடும் சர்ச்சையாகி வருகிறது. சர்ச்சையாகும் வகையிலேயே அவரும் பேசி வருகிறார். மக்கள் ஒருபக்கம் போனால் இவர் இன்னொரு பக்கம் போகிறார். இப்படித்தான் ஆரம்பத்திலிருந்தே நடந்து வருகிறது.

முதலில் பெரியார்

பெரியார் குறித்த சர்ச்சை முடிந்த நிலையில் இன்று இன்னொரு பேட்டி அளித்தார் ரஜினி. அதில் என்ஆர்சி குறித்து அவர் கூறிய கருத்துக்கள் மீண்டும் சர்ச்சையைக் கிளப்பியுள்ளன. அவரது கருத்துக்கு பல்வேறு கட்சித் தலைவர்களும் கடும் கண்டனம் தெரிவித்து வருகின்றனர். மேலும் மாணவர்களை அரசியல் கட்சிகள் தங்களது சுயலாபத்துக்காக தூண்டி விட்டு வருவதாகவும் அவர் கூறியுள்ளார்.

மாணவர் போராட்டம்

தொடர்ந்து போராட்டங்களை அவர் கொச்சைப்படுத்துவது போல பேசி வருகிறார் என்றும் எதிர்ப்புகள் வலுத்துள்ளன. இந்த நிலையில் காங்கிரஸ் எம்பி கார்த்தி சிதம்பரம், ரஜினியை நேரடியாகவே கடுமையாக கண்டித்துள்ளார். இது யாரும் எதிர்பாராதது. கார்த்தி சிதம்பரம் ரஜினி குறித்து இதுவரை நேரடியாக கண்டனம் தெரிவிக்கும் வகையில் எந்தக் கருத்தும் தெரிவித்ததில்லை.

As expected parrots the script written by his puppeteers @BJP4India https://t.co/Fw5IvgOUrT

— Karti P Chidambaram (@KartiPC) February 5, 2020

கார்த்தி சிதம்பரம்

இந்த நிலையில் நேரடியாக ரஜினியை அவர் விமர்சித்துள்ளார். இதுதொடர்பாக அவர் போட்ட ஒரு டிவீட்டில், எதிர்பார்த்தது போலவே, சொன்னதைச் சொல்லும் கிளிப் பிள்ளை போல எழுதிக் கொடுத்ததை வாசித்து வருகிறார் ரஜினிகாந்த் என்று கூறியுள்ளார். அவர் அளித்த பேட்டியை விமர்சிக்கும் வகையில் இப்படி ஒரு டிவீட்டைப் போட்டார் கார்த்தி சிதம்பரம்.

No reason for @rajinikanth to pretend that he is going to form a new political party, might as well join the @BJP4India and spare us the charade.

— Karti P Chidambaram (@KartiPC) February 5, 2020

ரஜினி பாஜகவில் சேரலாம்

அடுத்து இன்னொரு டிவீட்டைப் போட்டுள்ளார் கார்த்தி சிதம்பரம். இதுதான் ஹைலைட். அதாவது இந்த டிவீட்டில், கட்சி ஆரம்பிக்கப் போவதாக ரஜினி இனியும் கூறிக் கொண்டிருக்க வேண்டாம். பேசாமல் அவர் பாஜகவிலேயே போய்ச் சேர்ந்து விடலாம் என்று கார்த்தி சிதம்பரம் தனது 2வது டிவீட்டில் போட்டுள்ளார். இது ரஜினியை நேரடியாக அட்டாக் செய்யும் வகையில் உள்ளது.

கடும் தாக்கு

முன்னாள் நிதியமைச்சர் ப.சிதம்பரம் ரஜினி குறித்து சாப்ட் கார்னருடன் இருப்பவராக அறியப்படுபவர். இந்த நிலையில் அவரது மகனும், காங்கிரஸ் எம்பியுமான கார்த்தி சிதம்பரம், ரஜினியை நேரடியாகவே பாஜகவில் போய்ச் சேரலாமே என்று விமர்சித்திருப்பது ஆச்சரியத்தை ஏற்படுத்துவதாக உள்ளது. அந்த அளவுக்கு ரஜினி தனக்கு நெருக்கமானவர்களையும் கூட எரிச்சலடையும் வகையில் செயல்படுகிறாரா என்ற கேள்வியையும் இது எழுப்பியுள்ளது.

English summary

Rajinikanth need not pretend that going to launch new party, instead he can join BJP, said Congress MP Karthi Chidambaram.