திமுக பொதுச்செயலாளராகும் துரைமுருகன்... பொருளாளர் பதவிக்கு குறிவைக்கும் எ.வ. வேலு

Updated: Saturday, February 29, 2020, 11:54 [IST]

சென்னை: திமுகவில் அடுத்தடுத்து நடக்க இருக்கும் மாற்றங்களால் எந்த பக்கத்தில் இருந்து எப்படி பூதம் கிளம்பும் என்கிற அச்சத்தில் இருக்கிறதாம் அண்ணா அறிவாலயம்.

சட்டசபை தேர்தல், உள்ளாட்சி தேர்தலில் கொங்கு மண்டலத்தில் ஏற்பட்ட தோல்விகளைத் தொடர்ந்து அப்பகுதியில் கட்சி ரீதியாக திமுக தலைவர் ஸ்டாலின் மாற்றங்களை மேற்கொண்டு வருகிறார். இதனடிப்படையில் சேலம் வீரபாண்டி ஆ. ராஜாவு, தேர்தல் பணிக்குழு செயலாளராக்கப்பட்டார். இது அவரது ஆதரவாளர்களை கொந்தளிக்க வைத்திருக்கிறது.

ராஜ்யசபா சீட் இல்லை.. அதிமுக அதிரடி முடிவு..அதிர்ச்சியில் தேமுதிக.. விஜயகாந்த் வீட்டில் பஞ்சாயத்து! ராஜ்யசபா சீட் இல்லை.. அதிமுக அதிரடி முடிவு..அதிர்ச்சியில் தேமுதிக.. விஜயகாந்த் வீட்டில் பஞ்சாயத்து!

திமுக உட்கட்சி தேர்தல்

இந்நிலையில் திமுகவின் உட்கட்சி தேர்தல் ஜரூராக நடைபெற்று வருகின்றன. சட்டசபை தேர்தல் நடைபெறும் நிலையில் உட்கட்சி தேர்தலில் வழக்கமாக வெடிக்கும் கோஷ்டி பூசல் எப்படியான தாக்கத்தை தரப்போகிறதோ என்கிற கவலை திமுக தலைமையிடம் இருக்கிறதாம். இதனால் உட்கட்சி தேர்தலின் ஒவ்வொரு நகர்வையும் உன்னிப்பாக கவனித்துக் கொண்டிருக்கிறதாம் அறிவாலயம்.

பொதுச்செயலாளர், பொருளாளர்

இதனிடையே திமுகவின் அடுத்த பொதுச்செயலாளர்? அப்படி புதிய பொதுச்செயலாளர் நியமிக்கப்பட்டால் பொருளாளர் யார்? என்கிற விவாதம் ஒரு பக்கம்.. இந்த பதவிகளுக்கான லாபிகள் இன்னொரு பக்கம் என அதிகாரப் போட்டியும் தொடங்கி இருக்கிறது. திமுகவின் பொதுச்செயலாளராக இருக்கும் பேராசிரியர் அன்பழகன் வயது மூப்பின் காரணமாக ஆக்டிவ் அரசியலில் இல்லை.

சீனியர்கள் பட்டியல்

இதனால் திமுகவின் புதிய பொதுச்செயலாளராக தற்போதைய சீனியாரிட்டி லிஸ்ட் படி துரைமுருகனுக்குத்தான் வாய்ப்பு. அதேநேரத்தில் துரைமுருகன் வசம் இருக்கும் பொருளாளர் பதவி யாருக்கு என்பதில்தான் பெரும் போட்டியே நிலவுகிறது. திமுகவின் சீனியர்கள் லிஸ்ட்டில் டி.ஆர். பாலு, சுப்புலட்சுமி ஜெகதீசன், திண்டுக்கல் ஐ பெரியசாமி, திருச்சி கே.என்.நேரு, ஆ. ராசா, விழுப்புரம் பொன்முடி என ஒரு நீண்ட பட்டியலே இருக்கிறது.

ஓவர்டேக் செய்யும் எ.வ.வேலு

இவர்கள் அத்தனை பேரையும் ஓவர் டேக் செய்து எப்படியாவது பொருளாளர் பதவியை பெற வேண்டும் என்பதில் எ.வ.வேலு முனைப்புடன் இருக்கிறாராம். எ.வ.வேலுவுக்கு கிச்சன் கேபினட் ஆசியும் இருக்கிறதாம். இதனால் இப்போதிருந்தே எ.வ.வேலு தரப்பு அத்தனை லாபிகளையும் முழு வீச்சில் தொடங்கி இருக்கிறது என்கின்றனர் சீனியர் திமுக நிர்வாகிகள்.