அதிமுக வேண்டாமே... தங்க தமிழ்ச்செல்வனைத் தொடர்ந்து பழனியப்பனும் திமுகவில் இணைகிறார்?
Recommended Video
சென்னை: அமமுகவில் இருந்து நீக்கப்பட்ட தங்க தமிழ்ச்செல்வனைத் தொடர்ந்து முன்னாள் அமைச்சர் பழனியப்பனும் திமுகவில் இணைய இருப்பதாக கூறப்படுகிறது.
லோக்சபா தேர்தலுக்கு முன்னதாக அமமுகவில் இருந்து வெளியேறிய செந்தில் பாலாஜி திமுகவில் இணைந்தார். பின்னர் லோக்சபா தேர்தலில் அமமுக படுதோல்வி அடைந்ததால் அந்த கட்சியின் கூடாரமே காலியாகி வருகிறது.
அமமுகவில் இருந்து அதிமுகவுக்கு நாள்தோறும் நிர்வாகிகள் தாவி வந்தனர். தங்க தமிழ்ச்செல்வனும் அதிமுகவுக்கு தாவக் கூடும் என செய்திகள் வெளியாகின.
ஆனால் தங்க தமிழ்ச்செல்வனை சேர்ப்பதற்கு ஓபிஎஸ் கடும் எதிர்ப்பு தெரிவித்திருக்கிறார். இதனால் வேறுவழியே இல்லாமல் திமுகவில் ஐக்கியமாக முடிவெடுத்துவிட்டார் தங்க தமிழ்ச்செல்வன்.
அவரைத் தொடர்ந்து அதிமுகவுக்கு போவார் என கூறப்பட்ட முன்னாள் அமைச்சர் பழனியப்பனும் திமுகவில் இணையக் கூடும் என கூறப்படுகிறது. அதிமுகவின் எதிர்காலமே கேள்விக்குறியாகி உள்ள நிலையில் திமுகவுக்கு போனால் அரசியலில் எதிர்காலம் கிடைக்கும் என்ற நம்பிக்கையில்தான் பழனியப்பனும் திமுகவுக்கு தாவக் கூடும் என கூறப்படுகிறது.
அதிமுகவில் இரட்டை தலைமை நீடிப்பதால் அக்கட்சிக்கு செல்வதற்கு முன்னாள் எம்.எல்.ஏக்கள் தயங்குவதாகவும் அக்கட்சி வட்டாரங்கள் தெரிவிக்கின்றன.