அமெரிக்காவின் முதல் தமிழ் துணை அதிபர் கமலா ஹாரிஸுக்கு மு.க.ஸ்டாலின், சோனியா, ராகுல் காந்தி வாழ்த்து
சென்னை: அமெரிக்காவின் முதல் தமிழ் துணை அதிபர் கமலா ஹாரிஸுக்கு திமுக தலைவர் மு.க.ஸ்டாலின் வாழ்த்து தெரிவித்துள்ளார்.
அமெரிக்க அதிபர் தேர்தலில் ஜோ பிடன் வென்றுள்ளார். தமிழ்நாட்டின் மன்னார்குடியை தாய்வழி பூர்வீகமாக கொண்ட கமலா ஹாரிஸ், அமெரிக்காவின் துணை அதிபராகிறார்.
அமெரிக்காவின் முதலாவது பெண் துணை அதிபர்; முதலாவது கறுப்பின துணை அதிபர், முதலாவது தமிழ் துணை அதிபர் என்ற பெருமைக்குரியவராகிறார் கமலா ஹாரிஸ்.
ஜோ பிடன், கமலா ஹாரிஸ் ட்விட்டர் புரொபைலில் அதிபர், துணை அதிபர் என மாற்றம
ஜோ பிடனுக்கு வாழ்த்து
கமலா ஹாரிஸின் வெற்றிக்கு திமுக தலைவர் மு.க.ஸ்டாலின் வாழ்த்து தெரிவித்துள்ளார். அவர் தமது வாழ்த்து செய்தியில் கூறியுள்ளதாவது: அமெரிக்க அதிபராகத் தேர்ந்தெடுக்கப்பட்டுள்ள ஜோ பைடன் அவர்களுக்கும் துணை அதிபராகத் தேர்ந்தெடுக்கப்பட்டுள்ள கமலா ஹாரிஸ் அவர்களுக்கும் வாழ்த்துகள்!
தமிழ் பாரம்பரிய பெண்
வரலாற்றுச் சிறப்பு வாய்ந்த இந்த அமெரிக்கத் தேர்தலில் தமிழ்ப் பாரம்பரியத்தைச் சேர்ந்த பெண் ஒருவரைத் தங்களது துணை அதிபராக அமெரிக்க மக்கள் தேர்ந்தெடுத்துள்ளது மகிழ்ச்சியளிக்கிறது. இவ்வாறு மு.க.ஸ்டாலின் கூறியுள்ளார்.
சோனியா வாழ்த்து
காங்கிரஸ் தலைவர் சோனியா காந்தி தமது வாழ்த்து செய்தியில், ஜோ பிடன், கமலா ஹாரிஸ் தலைமையில் உலக நாடுகளுக்கும் நமது பிராந்தியத்தின் அமைதி, வளர்ச்சி மேம்பட நெருக்கமான உறவை இந்தியா எதிர்பார்க்கிறது என அறிக்கை ஒன்றில் கூறியுள்ளார்.
ராகுல் ட்வீட்
காங்கிரஸ் மூத்த தலைவர் ராகுல் காந்தி, ஜோ பிடனுக்கும் கமலா ஹாரிஸுக்கும் தனித்தனியே ட்விட்டர் பக்கத்தில் வாழ்த்து தெரிவித்துள்ளார். இந்திய வம்சாவளியை சேர்ந்த கமலா ஹாரிஸ், முதலாவது பெண் துணை அதிபராவது பெருமைக்குரியது என வாழ்த்தியுள்ளார் ராகுல் காந்தி.
டிடிவி தினகரன் வாழ்த்து
அமமுக பொதுச்செயலாளர் டிடிவி தினகரன் தமது வாழ்த்து செய்தியில், அமெரிக்க வரலாற்றில் முதல் பெண் துணை அதிபராக தேர்ந்தெடுக்கப்பட்டுள்ள தமிழ் வம்சாவளியைச் சேர்ந்த திருமதி. கமலா ஹாரிஸ் அவர்களுக்கு மனப்பூர்வமான வாழ்த்துகள். வரது பூர்வீகமான திருவாரூர் மாவட்டம்,மன்னார்குடி அருகே உள்ள துளசேந்திரபுரம் கிராமத்திற்கு மட்டுமல்லாமல், ஒட்டுமொத்த தமிழர்களுக்கும் பெருமை சேர்க்கும் வகையில் அவரது செயல்பாடுகள் அமையட்டும் என கூறியுள்ளார்.