Just In

துரைமுருகனுக்கு கண்டனம்... தமிழக காங்.செயல் தலைவர் மோகன் குமாரமங்கலம் ஆவேசம்

Updated: Thursday, January 16, 2020, 12:42 [IST]

சென்னை: காங்கிரஸ் கூட்டணி குறித்து திமுக பொருளாளர் துரைமுருகன் கூறிய கருத்து வன்மையாக கண்டிக்கத்தக்கது என்று தமிழக காங்கிரஸ் கமிட்டி செயல் தலைவர் மோகன் குமாரமங்கலம் தெரிவித்துள்ளார்.

மேலும், 2006 முதல் 2011 வரையிலான காலகட்டத்தில் மைனாரிட்டி திமுக அரசுக்கு பெருந்தன்மையுடன் காங்கிரஸ் ஆதரவு அளித்ததாகவும் சுட்டிக்காட்டியுள்ளார்.

மோகன் குமாரமங்கலம் ட்விட்டர் மற்றும் முகநூலில் துரைமுருகனை விமர்சித்தும், திமுகவை பழித்தும் பதிவு வெளியிட்டுள்ளதால் திமுகவினர் கொந்தளிப்பில் உள்ளனர்.

இதனிடையே மோகன் குமாரமங்கலத்தின் பதிவு பின்வருமாறு;

திமுக கூட்டணியிலிருந்து காங். விலகினாலும் கவலையில்லை.. உங்களுத்தான் நஷ்டம்.. துரைமுருகன் பரபரப்பு! திமுக கூட்டணியிலிருந்து காங். விலகினாலும் கவலையில்லை.. உங்களுத்தான் நஷ்டம்.. துரைமுருகன் பரபரப்பு!

கண்டனம்

காட்பாடியில் திராவிட முன்னேற்றக் கழகத்தின் பொருளாளர் திரு.துரைமுருகன் அவர்கள் காங்கிரஸ் பற்றி பேசியதை நான் வன்மையாக கண்டிக்கிறேன். காங்கிரஸ் கூட்டணியிலிருந்து வெளியேறி போனால் எங்களுக்கு எந்த விதமான நஷ்டமும் இல்லை என்று திரு துரைமுருகன் கூறினார். குறிப்பாக எனக்கு எந்தவிதமான பிரச்சனையும் இல்லை என்று சொன்னார். துரை முருகன் அவர்களுக்கு ஞாபக சக்தி குறைவு ஆகிவிட்டது என்று அவருக்கு சுட்டிக் காட்ட விரும்புகிறேன்.

தயவு தேவை

2006இல் திராவிட முன்னேற்றக் கழகத்தின் சிறுபான்மை அரசாங்கத்துக்கு முழு ஆதரவு தெரிவித்து ஆட்சியில் எந்தவிதமான பங்கையும் கேட்காமல் பெருந்தன்மையுடன் வழிநடத்தினோம். அந்த ஆட்சியில் திரு துரைமுருகன் பொதுப்பணித் துறை அமைச்சராக இருந்தார். அன்றைக்கு அவருக்கு காங்கிரஸ் பேரியக்கத்தின் தயவு தன்னுடைய பதவியை காப்பாற்றுவதற்காக தேவைப்பட்டது என்று அவர் மறந்து விடக்கூடாது.

கூட்டணி தர்மம்

2011இல் உங்களுடைய கூட்டணியில் தோல்வியை சந்திக்கப் போகிறோம் என்று தெரிந்தும் கூட அன்றைக்கு எதிர்க்கட்சித் தலைவி செல்வி ஜெயலலிதாவின் அழைப்பை புறக்கணித்தோம். கூட்டணி தர்மத்துக்கு கட்டுப்பட்டோம். அன்றைக்கு உங்களுக்கும் காங்கிரஸ் தேவைப்பட்டது என்பதை நீங்கள் மறந்து விடக்கூடாது.

மூத்தவர்

2019 வேலூர் இடைத்தேர்தலில் உங்கள் மகன் வெற்றி பெற்றதற்கு காங்கிரஸின் பங்கில்லை என்று நினைக்கிறீர்களா? திரு துரை முருகன் என்னைவிட வயதில், அனுபவத்தில் பெரியவர். ஆக அவருக்கு நான் அறிவுரை கூறும் இடத்தில் இல்லை. வேண்டுகோள் மட்டுமே அவரிடம் வைக்க விரும்புகிறேன். காங்கிரஸ் மட்டுமில்ல உங்களுடைய கூட்டணியில் இருக்கும் கட்சிகள் யாரையும் குறைத்து மதிப்பிட்டு பேசாதீர்கள்.