தங்க தமிழ்ச்செல்வன் வந்தாலும் சிக்கல்.. வராவிட்டாலும் சிக்கல்.. தர்மசங்கடத்தில் எடப்பாடி!
அதிமுகவுக்குள் தங்க தமிழ்செல்வன் இணைய ஓபிஎஸ் முட்டுக்கட்டை போடுகிறாராம்
Recommended Video
சென்னை: தங்க தமிழ்செல்வனா.. ம்ஹூம்.. கூடவே கூடாது. என்று ஒத்தைக்காலில் நிற்கிறாராம் ஓபிஎஸ்.. இதுதான் அதிமுகவின் இப்போதைய ஹாட் டாபிக்!
அமமுகவில் விரிசல் என்றதுமே, தங்க தமிழ்செல்வன் அதிமுகவுக்குள் செல்ல போகிறார் என்று சொல்லப்பட்டது.
அதே சமயம், செந்தில் பாலாஜி திமுகவில் இருப்பதாலும், அவருடன் தங்க தமிழ்செல்வனுக்கு நல்ல நெருக்கம் இருப்பதாலும் எப்படியும் திமுகவுக்குதான் தாவ போகிறார் என்றும் செய்திகள் கசிந்த வண்ணம் உள்ளன. ஆனால் இதற்கு எங்கள் பக்கம்தான் தங்க தமிழ்செல்வன் வரப்போகிறார் என்று திவாகரன் தரப்பு கூறியுள்ளது.
தேனி
இப்படி ஆளுக்கு ஒரு பக்கம் கூப்பிட்டு கொண்டு இருக்கும் நிலையில், ஓபிஎஸ் மட்டும் செம டென்ஷனில் இருக்கிறாராம். தன்னை தேனியில் எப்படியெல்லாம் தங்க தமிழ்செல்வன் எதிர்த்தார் என்பதை அதிமுக தரப்பிடம் எடுத்து சொன்னாராம்.
முட்டுக்கட்டை
தன் மகனை பற்றியெல்லாம் தொகுதிக்குள் எதைஎதையோ சொல்லி அசிங்கப்படுத்தியதாகவும், பதவி ஆசையில் நான் பாஜகவில் இணைய போவதாகவும், அவர்களிடம் சரணடைந்ததாகவும் இப்படியெல்லாம் என்னை பற்றி கேவலப்படுத்தியவர் தங்க தமிழ்செல்வன்தான். அதனால் அதிமுகவில் இணைத்துக்கொள்ள கூடாது என்று முட்டுக்கட்டை போட்டுள்ளதாக கூறப்படுகிறது.
பொறுப்பு
ஒருவேளை கட்சியின் நன்மைக்காக தங்க தமிழ்செல்வனை உள்ளே கொண்டு வருவதாக இருந்தால், அதற்கும் ஒரு கண்டிஷன் போட்டுள்ளாராம் ஓபிஎஸ். மாநில அளவில் என்ன பொறுப்பு வேண்டுமானாலும் கொடுத்து கொள்ளுங்கள், ஆனால் தொகுதி அளவில் அவரால் எங்களுக்கு எந்த தொந்தரவும் இருக்க கூடாது என்பதுதானாம் அது.
எடப்பாடி தரப்பு
ஏற்கனவே தேனியில் முதல்வர் பழனிசாமியாலேயே ஓபிஎஸ் செல்வாக்கை முறியடிக்கவில்லை. மேலும் புகைச்சலும் அதிகமாகி வருகிறது. இந்த சமயத்தில் தங்க தமிழ்செல்வனை கட்சிக்குள் கொண்டு வந்து, ஓபிஎஸ்-ன் செல்வாக்கை எடப்பாடி தகர்க்க முயலவும் வாய்ப்பிருப்பதாக சொல்லப்படுகிறது.
சிக்கல்
மற்றொரு பக்கம், ஓபிஎஸ்ஸை பகைத்து கொண்டால், பாஜக தரப்பு மூலம் பிரஷர் கொண்டு வந்து விட்டுவிடுவாரோ என்ற கலக்கமும் எடப்பாடிக்கு எழுந்துள்ளாம். அதனால் தங்க தமிழ்செல்வன் அதிமுகவுக்கு வந்தாலும் பிரச்சனை, வராவிட்டாவிலும் சிக்கல் என்ற நிலைமை அதிமுகவுக்கு ஏற்பட்டுள்ளது.